អាជ្ញាធរម៉ិកស៊ិក កំពុងស៊ើបអង្កេតលើការបំផ្ទុះរថយន្តនៅខេត្ត Zacatecas ដោយសង្ស័យថា អាចពាក់ព័ន្ធនឹងជម្លោះរវាងក្រុមជួញដូរគ្រឿងញៀនធំៗពីរគឺ Jalisco New Generation Cartel (CJNG) និងPacific Cartel។
ប្រភពពីសារព័ត៌មានAnadolu Agency នៅថ្ងៃទី៥ខែកញ្ញា។
ការបំផ្ទុះបានកើតឡើងកាលពីថ្ងៃទី៣០ ខែសីហា នៅខាងក្រៅស្នងការដ្ឋានប៉ូលិសក្នុងក្រុងOjocaliente បណ្តាលឱ្យមនុស្សយ៉ាងហោចណាស់១១នាក់រងរបួស និងបំផ្លាញផ្ទះ រថយន្ត និងអគារប៉ូលិស។
រដ្ឋមន្ត្រីសន្តិសុខម៉ិកស៊ិក លោក Omar García Harfuch បាននិយាយថា ជម្លោះដើម្បីដណ្តើមការគ្រប់គ្រងទឹកដី និងផ្លូវដឹកជញ្ជូនគ្រឿងញៀន គឺជាទិសដៅសំខាន់មួយនៃការស៊ើបអង្កេត។
អាជ្ញាធរបានចាប់ខ្លួនមនុស្ស ៣នាក់ ដែលសង្ស័យថាពាក់ព័ន្ធនឹងការវាយប្រហារ។ ក្នុងរថយន្តដែលប្រើសម្រាប់បំផ្ទុះ ត្រូវបានរកឃើញគ្រឿងផ្ទុះប្រមាណ ២០០គីឡូក្រាម។
សូមបញ្ជាក់ថា៖ ខេត្តZacatecas គឺជាតំបន់សំខាន់សម្រាប់ក្រុមឧក្រិដ្ឋជន ដោយសារតែមានផ្លូវតភ្ជាប់ទៅកាន់តំបន់ជាច្រើននៃប្រទេស។ អាជ្ញាធរបានបន្តស៊ើបអង្កេត ដើម្បីរកអ្នកនៅពីក្រោយការវាយប្រហារ និងកំណត់មូលហេតុពិតប្រាកដនៃការបំផ្ទុះនេះ៕
