អង្គការសហប្រជាជាតិ(UN) បានអំពាវនាវឱ្យភាគីជម្លោះនៅប្រទេសយេម៉ែនបន្ថយភាពតានតឹង និងចៀសវាងសកម្មភាពដែលអាចធ្វើឱ្យការប្រយុទ្ធកាន់តែធ្ងន់ធ្ងរ ខណៈ UN ក៏បង្ហាញការព្រួយបារម្ភយ៉ាងខ្លាំងចំពោះសុវត្ថិភាពជនស៊ីវិលនៅតំបន់ហ្គាហ្សា និងតំបន់ West Bank។
ប្រភពពីសារព័ត៌មានAnadolu Agency នៅថ្ងៃទី៥ខែកញ្ញា។
អ្នកនាំពាក្យ UN លោក Stephane Dujarric បាននិយាយថា ការប្រយុទ្ធនៅតាមខ្សែប្រយុទ្ធជាច្រើនក្នុងប្រទេសយេម៉ែន រួមទាំងតំបន់ Ta’izz កំពុងកើនឡើង។ លោកអំពាវនាវឱ្យភាគីពាក់ព័ន្ធបង្ហាញការអត់ធ្មត់ និងចូលរួមក្នុងការចរចា ដើម្បីស្វែងរកដំណោះស្រាយនយោបាយ។
នៅតំបន់ហ្គាហ្សា UN ក៏ព្រួយបារម្ភអំពីសុវត្ថិភាពប្រជាជនស៊ីវិល ខណៈរដូវភ្លៀង និងរដូវរងាកំពុងខិតជិតមកដល់។ ប្រជាជនជាច្រើននៅតែរស់នៅក្នុងជំរំដែលមានមនុស្សកកកុញ ហើយប្រព័ន្ធសុខាភិបាលដែលរងការខូចខាតរួចហើយ អាចប្រឈមនឹងការកើនឡើងនៃជំងឺផ្សេងៗ។
ចំណែកនៅ West Bank UN រាយការណ៍ថា ប្រជាជនប៉ាឡេស្ទីនជាង ៦,៤០០នាក់ មកពីសហគមន៍ចំនួន ១៣០ ត្រូវបានបង្ខំឱ្យចាកចេញពីលំនៅឋានចាប់តាំងពីឆ្នាំ២០២៣ ហើយក្នុងចំណោមនោះជាងពាក់កណ្តាលជាកុមារ។
UN ក៏បានអំពាវនាវឱ្យបង្កើនជំនួយមនុស្សធម៌ និងអនុញ្ញាតឱ្យជំនួយចូលទៅដល់តំបន់ដែលរងគ្រោះ ដើម្បីជួយប្រជាជនដែលកំពុងប្រឈមនឹងការខ្វះខាតស្បៀងអាហារ ទឹក សេវាសុខាភិបាល និងទីជម្រក៕
