ទីភ្នាក់ងារឧតុនិយមជប៉ុន (JMA) បានចេញការព្រមានកម្រិតខ្ពស់បំផុតអំពីគ្រោះបាក់ដី នៅទីក្រុង Yakushima ខេត្ត Kagoshima នៅថ្ងៃសៅរ៍ទី៥ខែកញ្ញា បន្ទាប់ពីតំបន់នេះមានភ្លៀងធ្លាក់ខ្លាំងបំផុតមិនធ្លាប់មាន។
ប្រភពពីសារព័ត៌មានAnadolu Agency។
JMA បានព្រមានថា តំបន់ដែលមានហានិភ័យបាក់ដី អាចមានគ្រោះមហន្តរាយកើតឡើងរួចហើយ ហើយជីវិតប្រជាជនកំពុងស្ថិតក្នុង គ្រោះថ្នាក់ជាបន្ទាន់។
អាជ្ញាធរបានអំពាវនាវឱ្យប្រជាជននៅតំបន់រងគ្រោះ ចាកចេញទៅកាន់ទីកន្លែងមានសុវត្ថិភាពភ្លាមៗ និងកុំរង់ចាំរហូតដល់មានការព្រមានបន្ថែម ព្រោះពេលនោះអាចយឺតពេលក្នុងការរត់គេច។
ប្រសិនបើការទៅកាន់មជ្ឈមណ្ឌលជម្លៀសមានគ្រោះថ្នាក់ ប្រជាជនត្រូវរកទីជម្រកនៅក្នុងអគារដែលស្ថិតឆ្ងាយពី ជ្រោះ ភ្នំចោត និងស្ទឹង ដើម្បីជៀសវាងគ្រោះបាក់ដី និងទឹកជំនន់។
JMA បានបញ្ជាក់ថា ភ្លៀងធ្លាក់នៅតំបន់នេះមានកម្រិត មិនធ្លាប់មានពីមុន ហើយបានអំពាវនាវឱ្យប្រជាជនអនុវត្តតាមការណែនាំរបស់អាជ្ញាធរ ដើម្បីការពារជីវិតខ្លួនឯង និងក្រុមគ្រួសារ៕
