(ភ្នំពេញ)៖ ពាក់ព័ន្ធករណីសមត្ថកិច្ចចុះឃាត់ខ្លួនបុរសម្នាក់ រហូតមានបាតុភាពផ្អើលពេញបណ្តាញសង្គម កាលពីព្រលប់ថ្ងៃទី៦ ខែកញ្ញា ឆ្នាំ២០២៦។
*គឺផ្ដើមចេញពីគ្រោះថ្នាក់ចរាចរណ៍ កាលពីរសៀលថ្ងៃទី១៧ ខែសីហា ឆ្នាំ២០២៦ ត្រង់ផ្លូវលេខ៥២៨ និងផ្លូវលេខ២៨៥ សង្កាត់បឹងកក់ទី១ ខណ្ឌទួលគោក បណ្តាលឲ្យក្មេងស្រីជំទង់ម្នាក់ដែលជិៈម៉ូតូបាក់ដៃ និងកំពុងសម្រាកព្យាបាលនៅមន្ទីរពេទ្យ.!។
*ពេលនោះលោក ហេង រតនា ស្នងការរងទទួលផែនចរាចរណ៍ ក៏ធ្លាប់បង្ហោះលើហ្វេសប៊ុក ឲ្យម្ចាស់ប្រេនមួយ ចូលខ្លួនដោះស្រាយរឿងបង្កគ្រោះថ្នាក់ចរាចរណ៍។
ដោយក្រោយកើតហេតុ អ្នកបើករថយន្ត បានបើកគេចមិនបានឈប់ដោះស្រាយនៅកន្លែងកើតហេតុនោះទេ។
បន្ទាប់មកម្តាយរបស់អ្នកបើករថយន្ត និងមេធាវី បានចូលខ្លួនដោះស្រាយនៅស្នងការដ្ឋាននគរបាលរាជធានីភ្នំពេញ ដើម្បីផ្តល់សំណងជូនយុវតីរងគ្រោះ ដែលបាក់ដៃម្ខាង.!។
ក្នុងនោះនគរបាល ក៏បានសុំដីកាបញ្ជាឲ្យចូលខ្លួនពីតំណាងអយ្យការ ហើយនៅថ្ងៃទី១ ខែកញ្ញា ឆ្នាំ២០២៦ លោក ស៊ន មុនី ព្រះរាជអាជ្ញារងរាជធានីភ្នំពេញ បានចេញដីកាបញ្ជាឲ្យឈ្មោះ ស្រស់ ថាវ័ន្ត ភេទប្រុស អាយុ៣៣ឆ្នាំ រស់នៅផ្ទះលេខ១៥៥បេ ផ្លូវកប់ស្រូវ ភូមិឡោកំបោរ សង្កាត់ស្វាយប៉ាក ខណ្ឌឬស្សីកែវ ចូលខ្លួននៅការិយាល័យចរាចរណ៍ផ្លូវគោក ឲ្យបានមុនថ្ងៃទី២២ ខែកញ្ញា ឆ្នាំ២០២៦ ដើម្បីសាកសួរពាក់ព័ន្ធករណី«បើកបរបង្កគ្រោះថ្នាក់ចរាចរណ៍បណ្តាលឲ្យរបួសអ្នកដទៃ និងបើករថយន្តរត់គេចពីកន្លែងកើតហេតុ»។
បន្ទាប់ពីមានដីកានេះសមត្ថកិច្ចចរាចរណ៍ បានចុះឃាត់ខ្លួន រហូតមានបាតុភាពកើតឡើង និងចែកចាយតាមបណ្តាញសង្គម កាលពីល្ងាចថ្ងៃទី៦ ខែកញ្ញា ឆ្នាំ២០២៦។
ជាមួយគ្នានោះ គេឃើញលោក ហេង រតនា ស្នងការរងទទួលផែនការងារចរាចរណ៍ ចុះទៅសម្របសម្រួល និងដោះខ្នោះចេញពីដៃឈ្មោះ ស្រស់ ថាវ័ន្ត វិញ ស្របពេលដែលមានការធានាពីមេធាវី និងក្រុមគ្រួសារ ថា នឹងនាំឈ្មោះ ស្រស់ ថាវ័ន្ត ទៅដោះស្រាយនៅព្រឹកថ្ងៃទី៧ ខែកញ្ញា ឆ្នាំ២០២៦៕
