ការវាយប្រហាររបស់អ៊ីស្រាអែលនៅតំបន់ហ្គាហ្សា ក្នុងរយៈពេល២៤ម៉ោងចុងក្រោយ បានសម្លាប់ជនជាតិប៉ាឡេស្ទីនយ៉ាងហោចណាស់៥នាក់ ក្នុងនោះមានកុមារ២នាក់ ខណៈបទឈប់បាញ់នៅតែបន្តមាន។
ប្រភពពីសារព័ត៌មានTRT world នៅថ្ងៃទី៧ខែកញ្ញា។
នៅទីក្រុង Deir al-Balah ការបាញ់ផ្លោងរបស់អ៊ីស្រាអែលបានត្រូវអគារសិក្សាមួយដែលកំពុងប្រើជាជម្រកសម្រាប់គ្រួសារជម្លៀសខ្លួន បណ្តាលឱ្យកុមារអាយុ៧ឆ្នាំម្នាក់ស្លាប់។ នៅទីក្រុង Gaza ក៏មានមនុស្ស២នាក់ត្រូវបានសម្លាប់នៅតំបន់ Rimal ខណៈការវាយប្រហារដោយយន្តហោះគ្មានមនុស្សបើកលើរថយន្តស៊ីវិលមួយ បានសម្លាប់លោកYoussef Aqila និងកូនស្រីអាយុ ៩ឆ្នាំរបស់លោកឈ្មោះWafaa។
ការវាយប្រហារតាមអាកាស និងការបាញ់ផ្លោងបន្ថែមទៀតនៅតំបន់Tuffah និងជំរំជនភៀសខ្លួន Shati បានបណ្តាលឱ្យមនុស្សជាច្រើនរងរបួស។ ការវាយប្រហារមួយនៅព្រឹកព្រលឹមបានបំផ្លាញអគារពាណិជ្ជកម្ម Al-Sakhra និងធ្វើឱ្យប្រជាពលរដ្ឋ ៩នាក់រងរបួស ព្រមទាំងបង្ខំឱ្យប្រជាជនជាច្រើនចាកចេញពីទីលំនៅ។
សូមបញ្ជាក់ថា៖ តាមតួលេខរបស់ក្រសួងសុខាភិបាលក្នុងតំបន់ហ្គាហ្សា ការរំលោភបទឈប់បាញ់ចាប់តាំងពីថ្ងៃទី១០ ខែតុលា ឆ្នាំ២០២៥ បានសម្លាប់ជនជាតិប៉ាឡេស្ទីន ១,៣៤៤នាក់ និងធ្វើឱ្យ ៤,៤៦៤នាក់រងរបួស។ ចាប់តាំងពីសង្គ្រាមចាប់ផ្តើម មនុស្សជាង ៧៣,០០០នាក់ត្រូវបានរាយការណ៍ថាស្លាប់ និងជាង ១៧៤,០០០នាក់រងរបួសនៅហ្គាហ្សា៕
