និស្សិតប៉ាឡេស្ទីនប្រមាណ ១០០នាក់ ត្រូវបានបណ្តេញចេញ ឬផ្អាកការសិក្សាពីសាកលវិទ្យាល័យនៅអ៊ីស្រាអែល ចាប់តាំងពីសង្គ្រាមនៅតំបន់ហ្គាហ្សាចាប់ផ្តើមក្នុងខែតុលា ឆ្នាំ២០២៣។
ប្រភពពីសារព័ត៌មានAnadolu Agency នៅថ្ងៃទី៨ខែកញ្ញា។
របាយការណ៍បានឱ្យដឹងថា និស្សិតមួយចំនួនត្រូវបានចោទប្រកាន់ពីបទគាំទ្រភេរវកម្ម ដោយសារការបង្ហោះ ឬសកម្មភាពនៅលើបណ្តាញសង្គម។ សកម្មភាពមួយចំនួនដែលនាំឱ្យមានការស៊ើបអង្កេត រួមមានការចុច Like លើការបង្ហោះ ការបង្ហាញទង់ជាតិប៉ាឡេស្ទីន ការសរសេរពាក្យ «Palestine» ការចែករំលែកព័ត៌មាន ឬការបង្ហោះសារអធិស្ឋានសម្រាប់ប្រជាជននៅហ្គាហ្សា។
ក្នុងករណីជាង៨០នាក់ និស្សិតត្រូវបានផ្អាកការសិក្សាជាបណ្តោះអាសន្ន មុនពេលមានសវនាការ ឬការបញ្ជាក់ថាពួកគេបានប្រព្រឹត្តខុសពិតប្រាកដ។ ចំណែកនិស្សិតប្រមាណ២០នាក់ផ្សេងទៀត ត្រូវបានបណ្តេញចេញជាអចិន្ត្រៃយ៍ ឬផ្អាកការសិក្សារយៈពេលពី១ដល់ ៥ ឆ្នាំ។
អង្គការនេះបានចោទប្រកាន់ថា សាកលវិទ្យាល័យមួយចំនួនបានអនុវត្តវិធានការតឹងរ៉ឹងជាងចំពោះនិស្សិតប៉ាឡេស្ទីន បើប្រៀបធៀបនឹងនិស្សិតជ្វីហ្វ ហើយបានព្រមានថា ការអនុវត្តបែបនេះអាចបង្កការរើសអើង និងប៉ះពាល់ដល់សេរីភាពក្នុងការបញ្ចេញមតិរបស់និស្សិត។
របាយការណ៍នេះបានកើតឡើងក្នុងបរិបទដែលការរឹតត្បិតលើការបញ្ចេញមតិអំពីសង្គ្រាមនៅហ្គាហ្សា និងការគាំទ្រប្រជាជនប៉ាឡេស្ទីន បានកើនឡើងនៅក្នុងប្រទេសអ៊ីស្រាអែល ចាប់តាំងពីសង្គ្រាមចាប់ផ្តើម៕
