ក្រុមហ៊ុនMeta បានដាក់ឱ្យប្រើប្រាស់ជាផ្លូវការនូវជំនួយការ AI ថ្មីមួយឈ្មោះMuse ដែលអាចធ្វើកិច្ចការមួយចំនួនដោយស្វ័យប្រវត្តិជំនួសអ្នកប្រើ ដូចជា ផ្ញើអ៊ីមែល កក់ការធ្វើដំណើរ លក់រថយន្ត និងធ្វើប្រតិបត្តិការទូទាត់ប្រាក់។
ប្រភពពីសារព័ត៌មានReuter នៅថ្ងៃទី៩ខែកញ្ញា។
Meta បានឱ្យដឹងថាអ្នកប្រើអាចភ្ជាប់ Muse ទៅកម្មវិធីផ្សេងៗ ដូចជា អ៊ីមែល ប្រតិទិន ប្រព័ន្ធទូទាត់ប្រាក់ សេវាសុខភាព និងឧបករណ៍ Smart Home ដើម្បីឱ្យ AI អាចអនុវត្តការងារជំនួសពួកគេបាន។
ដំបូង Muse នឹងដាក់ឱ្យប្រើតែនៅសហរដ្ឋអាមេរិក តាមរយៈកម្មវិធី Muse ផ្ទាល់ ឬសេវាផ្ញើសារ WhatsApp។ Meta ក៏មានផែនការដាក់ AI នេះទៅក្នុងវ៉ែនតាឆ្លាតវៃរបស់ខ្លួននាពេលឆាប់ៗខាងមុខ។
ទោះជាយ៉ាងណា បច្ចេកវិទ្យានេះក៏បង្កការព្រួយបារម្ភអំពីសុវត្ថិភាព និងភាពឯកជនផងដែរ។ ការធ្វើតេស្តផ្ទៃក្នុងដែល Reuters រាយការណ៍បានរកឃើញថា AI អាចជាប់គាំងពេលអនុវត្តការងារ និងមានករណីបញ្ចេញទិន្នន័យរសើបដោយគ្មានការអនុញ្ញាត។
សូមបញ្ជាក់ថា៖ Muse គឺជាផ្នែកសំខាន់មួយនៃផែនការរបស់នាយកប្រតិបត្តិ Meta លោក Mark Zuckerberg ក្នុងការអភិវឌ្ឍ AI ដែលអាចជួយមនុស្សធ្វើការងារប្រចាំថ្ងៃដោយស្វ័យប្រវត្តិ។ Meta កំពុងវិនិយោគយ៉ាងច្រើនលើហេដ្ឋារចនាសម្ព័ន្ធ និងបន្ទះឈីប AI ដោយរំពឹងថាការចំណាយក្នុងឆ្នាំនេះនឹងលើសពី ១៣០ ពាន់លានដុល្លារ៕
