អ៊ីរ៉ង់បានបាញ់មីស៊ីលសំដៅទៅមូលដ្ឋានយោធាអាមេរិកមួយនៅប្រទេសហ្ស៊កដានី ដោយអះអាងថា វាជាការឆ្លើយតបចំពោះការវាយប្រហាររបស់សហរដ្ឋអាមេរិកលើអ៊ីរ៉ង់ និងសកម្មភាពប្រឆាំងនឹងនាវាដឹកប្រេងរបស់អ៊ីរ៉ង់។
ប្រភពពីសារព័ត៌មានTRT World នៅថ្ងៃទី៩ខែកញ្ញា។
យោធាហ្ស៊កដានីបានឱ្យដឹងថា អ៊ីរ៉ង់បានបាញ់មីស៊ីលបាលីស្ទិក ២០គ្រាប់ ទៅកាន់គោលដៅដែលមានមូលដ្ឋានទ័ពអាមេរិក។ ប្រព័ន្ធការពារអាកាសរបស់ហ្ស៊កដានីបានស្ទាក់ចាប់បាន១៨គ្រាប់ ខណៈមីស៊ីល២គ្រាប់ទៀតធ្លាក់នៅតំបន់ទំនេរ ដោយមិនបណ្តាលឱ្យប្រជាពលរដ្ឋរងគ្រោះ ឬខូចខាតហេដ្ឋារចនាសម្ព័ន្ធឡើយ។
ជាមួយគ្នានេះ កងឆ្មាំបដិវត្តន៍អ៊ីរ៉ង់ (IRGC) បានអះអាងថា ខ្លួនក៏បានវាយប្រហារលើនាវាចម្បាំងអាមេរិកចំនួន ២ គ្រឿង គឺ DDG-119 និង DDG-53 ដែលបំពាក់ប្រព័ន្ធមីស៊ីល និងប្រព័ន្ធការពារ Aegis។ IRGC អះអាងថា ការវាយប្រហារបានធ្វើឱ្យគោលដៅអាមេរិករងការខូចខាតយ៉ាងសំខាន់។
អ៊ីរ៉ង់បានចាត់ទុកការវាយប្រហារនេះថា ជាការសងសឹកចំពោះអ្វីដែលខ្លួនហៅថា សកម្មភាពឈ្លានពាន និងការរំខានដល់នាវាដឹកប្រេង និងនាវារបស់អ៊ីរ៉ង់។
សូមបញ្ជាក់ថា៖ ការវាយប្រហារនេះបង្ហាញថា ភាពតានតឹងរវាងអ៊ីរ៉ង់ និងសហរដ្ឋអាមេរិកកំពុងរីករាលដាលទៅកាន់មូលដ្ឋាន និងទ្រព្យសម្បត្តិយោធាអាមេរិកនៅក្នុងតំបន់មជ្ឈិមបូព៌ា៕
