សាកលវិទ្យាល័យ King’s College London (KCL) នឹងអនុញ្ញាតឱ្យនិស្សិតអេហ្ស៊ីបឈ្មោះ Usama Ghanem អាយុ ២២ឆ្នាំ ចូលរៀនវិញនៅឆ្នាំសិក្សា ២០២៦–២០២៧ បន្ទាប់ពីត្រូវបានព្យួរការសិក្សាអស់រយៈពេលជិត១៨ខែ ពាក់ព័ន្ធនឹងការចូលរួមក្នុងការតវ៉ាគាំទ្រប៉ាឡេស្ទីន។
ប្រភពពីសារព័ត៌មានAnadolu Agency នៅថ្ងៃទី១៧ខែកញ្ញា។
សាកលវិទ្យាល័យបានជូនដំណឹងថា Ghanem បានបំពេញលក្ខខណ្ឌដែលបានកំណត់ក្នុងអំឡុងពេលព្យួរ ហើយមិនមានហេតុផលបន្តការព្យួរ ឬហាមឃាត់គាត់មិនឱ្យចូលសាកលវិទ្យាល័យទៀតទេ។ ដូច្នេះ គាត់នឹងត្រូវបានអញ្ជើញឱ្យចុះឈ្មោះចូលរៀនវិញ។
KCL ក៏បានចាប់ផ្តើមដំណើរការដើម្បី ស្តារការឧបត្ថម្ភទិដ្ឋាការរបស់ Ghanem ឡើងវិញ។ ទោះជាយ៉ាងណា សាកលវិទ្យាល័យបានបញ្ជាក់ថា ការសម្រេចចិត្តចុងក្រោយលើទិដ្ឋាការ គឺស្ថិតក្រោមសិទ្ធិរបស់អាជ្ញាធរទិដ្ឋាការ និងអន្តោប្រវេសន៍របស់ចក្រភពអង់គ្លេស។
Ghanem បានបដិសេធការចោទប្រកាន់អំពីការប្រព្រឹត្តខុស ហើយនិយាយថា គាត់នឹងបន្តគាំទ្រ សិទ្ធិរបស់ប្រជាជនប៉ាឡេស្ទីន។ ទន្ទឹមនឹងនេះ បណ្តឹងផ្លូវច្បាប់ដែលគាត់បានដាក់ប្រឆាំងនឹងសាកលវិទ្យាល័យ ដោយចោទប្រកាន់ពីការរំលោភសិទ្ធិមនុស្ស ការរើសអើង និងការយាយី នៅតែបន្តដំណើរការ។
KCL បានបញ្ជាក់ថា ការពិនិត្យឡើងវិញលើការព្យួររបស់គាត់ គឺជាផ្នែកមួយនៃនីតិវិធីធម្មតារបស់សាកលវិទ្យាល័យ ហើយគណៈកម្មការបានសម្រេចថា គាត់បានបំពេញលក្ខខណ្ឌដែលបានកំណត់៕
