រដ្ឋមន្ត្រីការបរទេសកូរ៉េខាងជើង លោកស្រី Choe Son Hui បាននិយាយនៅថ្ងៃទី២៤ ខែកញ្ញា ថា កូរ៉េខាងជើងនឹង រក្សាអាវុធនុយក្លេអ៊ែររបស់ខ្លួនជារៀងរហូត ហើយមិនមានបំណងបោះបង់អាវុធទាំងនេះឡើយ។
ប្រភពពីសារព័ត៌មានCNA។
ការប្រកាសនេះធ្វើឡើងមួយថ្ងៃបន្ទាប់ពីប្រធានាធិបតីកូរ៉េខាងត្បូង Lee Jae Myung ថ្លែងនៅមហាសន្និបាតអង្គការសហប្រជាជាតិថា លោកចង់បញ្ឈប់ការបង្កើនសមត្ថភាពអាវុធរបស់កូរ៉េខាងជើង និងចង់ឱ្យឧបទ្វីបកូរ៉េក្លាយជាតំបន់ គ្មានអាវុធនុយក្លេអ៊ែរ នៅពេលអនាគត។
កូរ៉េខាងជើងបានចែងក្នុងច្បាប់របស់ខ្លួនរួចហើយថា ខ្លួនជារដ្ឋមានអាវុធនុយក្លេអ៊ែរ ហើយមេដឹកនាំកូរ៉េខាងជើង លោក Kim Jong Un បានប្រកាសជាច្រើនលើកថា កម្មវិធីអាវុធនុយក្លេអ៊ែររបស់ប្រទេសមិនអាចបញ្ច្រាសបានទេ។
លោកស្រី Choe បានបញ្ជាក់ថា កូរ៉េខាងជើងនឹងបន្តរក្សាអាវុធនុយក្លេអ៊ែរ ដោយមិនគិតពីការអំពាវនាវឱ្យរំសាយអាវុធពីកូរ៉េខាងត្បូង៕
