រុស្ស៊ី និងអ៊ុយក្រែនបានវាយប្រហារគ្នាទៅវិញទៅមកតាមអាកាសពេញមួយយប់ បណ្តាលឱ្យមនុស្សម្នាក់ស្លាប់ និង៥នាក់រងរបួស។
ប្រភពពីសារព័ត៌មានAA news នៅថ្ងៃទី២ខែតុលា។
នៅអ៊ុយក្រែន ប្រធានាធិបតី Volodymyr Zelenskyy និយាយថា ដ្រូនរុស្ស៊ីបានវាយប្រហារអគារស្នាក់នៅក្នុងទីក្រុងកៀវ បណ្តាលឱ្យមនុស្សម្នាក់ស្លាប់ និង៤នាក់រងរបួស។ ការវាយប្រហារក៏បានប៉ះពាល់ដល់សាលាមត្តេយ្យ ហាងលក់ទំនិញ និងអគារផ្សេងៗនៅតំបន់ជាច្រើន។
កងទ័ពអាកាសអ៊ុយក្រែននិយាយថា រុស្ស៊ីបានបញ្ជូនដ្រូន ១០៨គ្រឿង មកវាយប្រហារ ហើយអ៊ុយក្រែនបានបាញ់ទម្លាក់ ឬរារាំងបាន ៨៨គ្រឿង។
នៅរុស្ស៊ីវិញ អាជ្ញាធរនិយាយថា ដ្រូនអ៊ុយក្រែនបានវាយប្រហារតំបន់ Volgograd បណ្តាលឱ្យអគារមួយឆេះ និងមនុស្សម្នាក់ត្រូវបញ្ជូនទៅមន្ទីរពេទ្យ។
ក្រសួងការពារជាតិរុស្ស៊ីអះអាងថា ខ្លួនបានបាញ់ទម្លាក់ ឬបំផ្លាញដ្រូនអ៊ុយក្រែន ៦៤៦គ្រឿង នៅតំបន់ជាច្រើន។
ភាគីទាំងពីរបានអះអាងថា ខ្លួនបានវាយប្រហារគោលដៅដែលពាក់ព័ន្ធនឹងយោធា និងហេដ្ឋារចនាសម្ព័ន្ធ។ ប៉ុន្តែ មិនទាន់អាចផ្ទៀងផ្ទាត់ដោយឯករាជ្យបានទេ ចំពោះការអះអាងទាំងនេះ៕
