រដ្ឋាភិបាលអង់គ្លេសបាននិយាយថា មូលដ្ឋានទ័ពអាកាស RAF Fairford នៅតែមានសុវត្ថិភាព បន្ទាប់ពីសហរដ្ឋអាមេរិកបានដកយន្តហោះទម្លាក់គ្រាប់បែករបស់ខ្លួនចេញពីមូលដ្ឋាននេះ ត្រឡប់ទៅសហរដ្ឋអាមេរិកវិញ។
ប្រភពពីសារព័ត៌មានAA news នៅថ្ងៃទី៦ខែតុលា។
មន្ទីរបញ្ចកោណបានបញ្ជាក់ថា យន្តហោះទម្លាក់គ្រាប់បែកអាមេរិក ប្រហែល ១២ គ្រឿងប្រភេទ B-1 ត្រូវបានផ្លាស់ទីចេញពី RAF Fairford។ សារព័ត៌មានអាមេរិកបានរាយការណ៍ថា ការដកយន្តហោះនេះអាចពាក់ព័ន្ធនឹងការគំរាមកំហែងលើមូលដ្ឋាន។
កាលពីថ្ងៃទី ២៧ ខែកញ្ញា ប៉ូលិសអង់គ្លេសត្រូវបានជូនដំណឹងអំពីរថយន្តគួរឱ្យសង្ស័យចំនួន ៣ គ្រឿងនៅក្បែរមូលដ្ឋាន។ មនុស្ស ៥ នាក់ត្រូវបានចាប់ខ្លួនដំបូងក្រោមការសង្ស័យពាក់ព័ន្ធនឹងបទល្មើសភេរវកម្ម ហើយក្រោយមកត្រូវបានដោះលែងឱ្យនៅក្រៅឃុំ។ បុរសទី៦ ដែលមានសញ្ជាតិអង់គ្លេស-អ៊ីរ៉ង់ ក៏ត្រូវបានចាប់ខ្លួន និងដោះលែងឱ្យនៅក្រៅឃុំផងដែរ។
រដ្ឋមន្ត្រីការបរទេសអាមេរិក Marco Rubio បាននិយាយថា លោកមិនអាចភ្ជាប់ដោយផ្ទាល់ថា ឧប្បត្តិហេតុនេះជាមូលហេតុនៃការដកយន្តហោះបានទេ។ លោកថា ការផ្លាស់ទីយន្តហោះយោធាទៅតំបន់ផ្សេងៗ គឺជារឿងដែលកើតឡើងជាប្រចាំ ដោយសារការធ្វើសមយុទ្ធ និងការផ្លាស់ប្តូរកងកម្លាំង។
តាម BBC ការសម្រេចចិត្តដកយន្តហោះនេះ ត្រូវបានធ្វើឡើងនៅកម្រិតប្រតិបត្តិការយោធារបស់អាមេរិក ហើយបានជូនដំណឹងទៅភាគីអង់គ្លេស៕
