គណបក្សប្រជាធិបតេយ្យអាមេរិក បានដាក់ពាក្យប្តឹងប្រធានាធិបតី ដូណាល់ ត្រាំ ជុំវិញការផ្សាយពាណិជ្ជកម្មតាមទូរទស្សន៍ ដែលប្រើប្រាស់ថវិកាសាធារណៈ និងត្រូវបានចោទថា មានគោលបំណងផ្សព្វផ្សាយនយោបាយរបស់លោក។
ប្រភពពីសារព័ត៌មានAl Jazeera នៅថ្ងៃទី៨ខែតុលា។
ប្រធានគណបក្សប្រជាធិបតេយ្យ លោក Ken Martin បាននិយាយថា ការផ្សាយពាណិជ្ជកម្មទាំងនេះអាចជួយពង្រឹងឱកាសរបស់គណបក្សសាធារណរដ្ឋ នៅមុនការបោះឆ្នោតពាក់កណ្តាលអាណត្តិ ដែលគ្រោងធ្វើនៅថ្ងៃទី៣ ខែវិច្ឆិកា។
នៅថ្ងៃដដែល អង្គការឃ្លាំមើលប្រជាធិបតេយ្យ Common Cause ក៏បានដាក់ពាក្យប្តឹងមួយទៀត ដោយអះអាងថា ការផ្សាយពាណិជ្ជកម្មនេះមានលក្ខណៈនយោបាយច្បាស់លាស់ និងអាចរំលោភច្បាប់ដែលហាមប្រើថវិកាសាធារណៈសម្រាប់ការឃោសនានយោបាយ។
បណ្តឹងទាំងពីរអះអាងថា លោក ត្រាំ បានបញ្ជាឱ្យសេតវិមានយកថវិកាចំនួន ២០លានដុល្លារ ដែលសភាអាមេរិកបានកំណត់សម្រាប់សកម្មភាពរំលឹកពាក់ព័ន្ធនឹងសន្តិសុខព្រំដែន មកប្រើសម្រាប់យុទ្ធនាការផ្សាយពាណិជ្ជកម្មនេះ។
ក្រុមប្តឹងចាត់ទុកថា ការប្រើប្រាស់ថវិកាបែបនេះរំលោភលើអំណាចរបស់សភា ព្រោះរដ្ឋាភិបាលត្រូវចំណាយថវិកាតាមគោលបំណងដែលសភាបានអនុម័ត៕
