សម្តេចប៉ាប លីអូទី១៤ ព្រះជន្ម ៧១ ព្រះវស្សា បានទទួលការវះកាត់យកដុំមហារីកចេញពីសួតខាងស្តាំដោយជោគជ័យ នៅមន្ទីរពេទ្យ Gemelli ក្នុងទីក្រុងរ៉ូម ប្រទេសអ៊ីតាលី កាលពីថ្ងៃអង្គារ ទី១៣ ខែតុលា ឆ្នាំ២០២៦។
ប្រភពពីសារព័ត៌មានAFP។
តាមការបញ្ជាក់របស់បុរីវ៉ាទីកង់ ការវះកាត់បានចំណាយពេលប្រហែល ៩០ នាទី ហើយមិនមានផលវិបាកអ្វីឡើយ។ គ្រូពេទ្យបានវះកាត់យកផ្នែកខាងក្រោមនៃសួតខាងស្តាំចេញ ដើម្បីព្យាបាលជំងឺមហារីកសួតប្រភេទមួយហៅថា Pulmonary Adenocarcinoma។
បច្ចុប្បន្ន គ្រូពេទ្យកំពុងធ្វើតេស្តបន្ថែម ដើម្បីពិនិត្យថាតើមហារីកបានរាលដាលទៅផ្នែកផ្សេងទៀតនៃរាងកាយឬអត់។ អ្នកជំនាញវេជ្ជសាស្ត្របានបញ្ជាក់ថា ប្រសិនបើជំងឺនេះត្រូវបានរកឃើញនៅដំណាក់កាលដំបូង និងមិនទាន់រាលដាល នោះឱកាសជាសះស្បើយអាចមានខ្ពស់។
បុរីវ៉ាទីកង់រំពឹងថា សម្តេចប៉ាបនឹងត្រូវការពេលប្រហែលមួយសប្តាហ៍ដើម្បីសម្រាក និងស្តារសុខភាពឡើងវិញ។ ការជួបជាមួយសាធារណជនរបស់ព្រះអង្គត្រូវបានលុបចោលរហូតដល់ថ្ងៃទី២០ ខែតុលា ហើយការវះកាត់នេះក៏បង្កឱ្យមានការសង្ស័យថា តើព្រះអង្គអាចបំពេញទស្សនកិច្ចរយៈពេលវែងនៅអាមេរិកឡាទីននៅខែក្រោយបានឬយ៉ាងណា។
បន្ទាប់ពីដំណឹងនៃការវះកាត់ត្រូវបានផ្សព្វផ្សាយ មន្ត្រី និងមេដឹកនាំមួយចំនួន រួមទាំងរដ្ឋមន្ត្រីការបរទេសអាមេរិក លោក Marco Rubio និងនាយករដ្ឋមន្ត្រីអូស្ត្រាលី លោក Anthony Albanese បានសម្តែងការព្រួយបារម្ភ និងជូនពរឱ្យសម្តេចប៉ាបឆាប់ជាសះស្បើយ៕
