កាលពីថ្ងៃចន្ទទី១៩.១០.២០២៦ លោក Elon Musk បានសន្យាថា ខ្លួននឹងផ្តល់ភាគហ៊ុនមួយ ចំណែកនៃក្រុមហ៊ុន SpaceX របស់លោក ជូនដល់«កុមារគ្រប់រូបនៅសហរដ្ឋអាមេរិក» នៅឆ្នាំក្រោយ។
សារព័ត៌មានAP។
ការប្រកាសនេះ ធ្វើឡើងមួយថ្ងៃបន្ទាប់ពីក្រុមហ៊ុនបច្ចេកវិទ្យាបញ្ញាសិប្បនិម្មិត(AI) ឈ្មោះ Anthropic បានប្រកាសនៅលើបណ្តាញសង្គមថា ខ្លួននឹងបែងចែកភាគហ៊ុនចំនួន ៥% ទៅក្នុងមូលនិធិថ្មីមួយដែលមានគោលបំណង«ផ្តល់ផលប្រយោជន៍ដល់សាធារណជន»។
នៅក្នុងការឆ្លើយតបទៅនឹងការបង្ហោះកាលពីថ្ងៃអាទិត្យនោះ លោក Musk បានសរសេរថា៖«ខ្ញុំស្នើឱ្យផ្តល់ភាគហ៊ុនទាំងនោះដោយផ្ទាល់ទៅកាន់សាធារណជន»។
ភាគហ៊ុនរបស់ក្រុមហ៊ុនSpaceX ដែលគ្រោងនឹងរាយការណ៍ពីប្រាក់ចំណូលប្រចាំត្រីមាសរបស់ខ្លួននៅថ្ងៃអង្គារនោះ បានបិទក្នុងតម្លៃ១៤៦,០៣ ដុល្លារ កាលពីថ្ងៃសុក្រ។
ដោយសារសហរដ្ឋអាមេរិក មានកុមារអាយុក្រោម ១៨ឆ្នាំប្រហែល ៧៣ លាននាក់ នោះមានន័យថាការសន្យារបស់លោក Muskមានតម្លៃប្រហែល ១០,៦៦ពាន់លានដុល្លារ។
ក្រុមហ៊ុន Anthropic បានបញ្ជាក់កាលពីថ្ងៃអាទិត្យថា ភាគហ៊ុនដែលខ្លួនបានបែងចែកនោះ នឹងត្រូវដាក់ចូលទៅក្នុង «មូលនិធិដើម្បីផលប្រយោជន៍សាធារណជនរបស់ Anthropic» (Anthropic Public Benefit Fund) ដែលជាអង្គភាពថ្មីមួយនៅក្នុងក្រុមហ៊ុន តម្លៃនៃមូលនិធិនេះអាចនឹងកើនឡើង នៅពេលដែលតម្លៃភាគហ៊ុនកើនឡើង។
លោក Musk មិនបានផ្តល់ព័ត៌មានលម្អិតបន្ថែមអំពីរបៀប ដែលការសន្យាផ្តល់ភាគហ៊ុននេះនឹងត្រូវបានអនុវត្តនោះទេ។
ប៉ុន្តែលោកបានបន្ថែមនៅក្នុងការបង្ហោះរបស់លោកថា៖«នេះនឹងក្លាយជាជំហានដំបូងក្នុងចំណោមជំហានជាច្រើនទៀត»។
ការប្រកាសរបស់លោក Musk និងក្រុមហ៊ុន Anthropic នេះ កើតឡើងក្នុងពេលដែលប្រជាជនអាមេរិកកាន់តែមានការព្រួយបារម្ភចំពោះបច្ចេកវិទ្យាបញ្ញាសិប្បនិម្មិត (AI)។ ការស្ទង់មតិថ្មីមួយពីមជ្ឈមណ្ឌលស្រាវជ្រាវកិច្ចការសាធារណៈ The Associated Press-NORC បានរកឃើញថា ជនជាតិអាមេរិកភាគច្រើន (៦៤%) យល់ថា AI កំពុងអភិវឌ្ឍ«លឿនពេក» ខណៈ ២៧% យល់ថាការអភិវឌ្ឍនេះគឺ «សមស្របហើយ»ហើយមានតែ ៨% ប៉ុណ្ណោះដែលយល់ថាវាដំណើរការ «យឺតពេក»។
លោក Dario Amodei មកពីក្រុមហ៊ុន Anthropic, លោក Sam Altman មកពីក្រុមហ៊ុន OpenAI, លោក Elon Musk មកពីក្រុមហ៊ុន SpaceX និងមេដឹកនាំលេចធ្លោផ្សេងទៀតនៅក្នុងវិស័យនេះ បានលើកឡើងកាលពីខែមុនថា ការអភិវឌ្ឍ AI គួរតែបន្ថយល្បឿន។
ការឯកភាពគ្នានេះបានកើតឡើង បន្ទាប់ពីអ្នកស្រាវជ្រាវម្នាក់នៅក្រុមហ៊ុន Anthropic បានលាលែងពីតំណែង ដោយបានព្រមានយ៉ាងធ្ងន់ធ្ងរអំពីគ្រោះថ្នាក់ដែលបច្ចេកវិទ្យានេះអាចបង្កឡើងដល់មនុស្សជាតិ។
ប៉ុន្តែមានឧបសគ្គជាច្រើន រួមទាំងការប្រកួតប្រជែងទាំងក្នុងស្រុកនិងអន្តរជាតិ ការស្វែងរកប្រាក់ចំណេញ និងការជំទាស់ពីសំណាក់លោកប្រធានាធិបតី Donald Trump ។
ដែលសុទ្ធតែជាកត្តារារាំងដល់កិច្ចខិតខំប្រឹងប្រែងរួមគ្នាក្នុងការគ្រប់គ្រងល្បឿននៃការអភិវឌ្ឍ AI។ លោក Musk បានក្លាយជាអ្នកបរិច្ចាគដ៏ធំបំផុតមួយរូប (ក្នុងចំណោមអ្នកដែលគេបានដឹង) សម្រាប់ការបោះឆ្នោតពាក់កណ្តាលអាណត្តិនៅឆ្នាំនេះ ដោយបានចំណាយប្រាក់ជាង ២៧៦ លានដុល្លារចាប់តាំងពីខែកក្កដាមក ដើម្បីព្យាយាមរក្សាអាសនៈភាគច្រើនរបស់គណបក្សសាធារណរដ្ឋនៅក្នុងសភា។
លោក Dario Amodei នាយកប្រតិបត្តិនៃក្រុមហ៊ុន Anthropic រួមជាមួយសហស្ថាបនិក ៥ នាក់ផ្សេងទៀត បានបង្កើតក្រុមហ៊ុន Anthropic ឡើងក្នុងទម្រង់ជា «សាជីវកម្មដើម្បីផលប្រយោជន៍សាធារណៈ» (public benefit corporation)។
នេះគឺជាទម្រង់មួយដែលក្រុមហ៊ុនស្វែងរកប្រាក់ចំណេញជ្រើសរើសយក ដើម្បីរក្សាតុល្យភាពរវាងគោលដៅហិរញ្ញវត្ថុ និងផលប៉ះពាល់ដល់សង្គម។
ក្រុមហ៊ុន Anthropic កំពុងរៀបចំផែនការដាក់លក់ភាគហ៊ុនជាសាធារណៈលើកដំបូង (IPO) ក្នុងទ្រង់ទ្រាយធំ ដែលអាចនឹងកើតឡើងនៅដើមខែវិច្ឆិកា។
កាលពីខែមិថុនា ក្រុមហ៊ុនបានបញ្ជាក់ថា ខ្លួនបានដាក់ឯកសារសម្ងាត់មួយទៅកាន់គណៈកម្មការមូលបត្រ និងផ្សារហ៊ុនសហរដ្ឋអាមេរិក (SEC) សម្រាប់គម្រោង IPO នេះ។
នៅក្នុងខែដដែលនោះ ក្រុមហ៊ុន SpaceX របស់លោក Musk បានបង្ហាញខ្លួនជាលើកដំបូងនៅលើទីផ្សារភាគហ៊ុន Wall Street ក្នុងនាមជាក្រុមហ៊ុនសាធារណៈ ដែលបានធ្វើឱ្យលោក Musk ក្លាយជាបុគ្គលដំបូងគេនៅលើពិភពលោកដែលមានទ្រព្យសម្បត្តិដល់កម្រិត«ទ្រីលាន» (trillionaire)។
ទោះជាយ៉ាងណាក៏ដោយ តម្លៃភាគហ៊ុនរបស់ SpaceX បានធ្លាក់ចុះ ៣៥,៣% បន្ទាប់ពីបានឡើងដល់កម្រិតខ្ពស់បំផុតនៅប៉ុន្មានថ្ងៃក្រោយការដាក់លក់ភាគហ៊ុនដំបូងនោះ ដែលមានន័យថាបច្ចុប្បន្នលោក Musk គឺជាមហាសេដ្ឋីកម្រិត «ប៊ីលាន» (billionaire)៕
