យោងតាមការរាយការណ៍របស់ស្ថានីយទូរទស្សន៍បារាំង BFMTV កាលពីថ្ងៃចន្ទទី១៩.១០.២០២៦ បានឱ្យដឹងថា បន្ទាប់ពីមានការតវ៉ាទ្រង់ទ្រាយធំអស់រយៈពេលជាច្រើនថ្ងៃ។
បង្កទៅជាអំពើហិង្សា អាជ្ញាធរបារាំង នឹងដាក់ចេញនូវបម្រាមគោចរនៅពេលយប់ ចាប់ពីម៉ោង ១០យប់ ដល់ម៉ោង ៦ព្រឹក នៅជុំវិញតំបន់ Place de la Republique ក្នុងទីក្រុងប៉ារីស និងតាមដងផ្លូវនានាជុំវិញតំបន់ Les Halles។
សារព័ត៌មានAnadolu។
អាជ្ញាធរបញ្ជាក់ថា បម្រាមគោចរនេះអនុវត្តចំពោះប្រជាពលរដ្ឋទាំងអស់ មិនមែនគ្រាន់តែចំពោះអនីតិជនប៉ុណ្ណោះទេ។
អាជ្ញាធរក៏បានប្រកាសហាមឃាត់ការធ្វើបាតុកម្មនៅក្នុងតំបន់មួយចំនួននៃទីក្រុងប៉ារីស ចាប់ពីម៉ោង៨ យប់ ដល់ម៉ោង៦ ព្រឹកផងដែរ។
វិធានការរឹតត្បិតទាំងនេះកើតឡើងក្នុងពេលដែលអាជ្ញាធរនៅទូទាំងប្រទេសបារាំងកំពុងដាក់ចេញនូវបម្រាមគោចរ និងវិធានការសន្តិសុខផ្សេងៗទៀត បន្ទាប់ពីមានអំពើហិង្សា និងការលួចប្លន់ក្នុងអំឡុងពេលនៃការតវ៉ានៅទូទាំងប្រទេសកាលពីចុងសប្តាហ៍ ដែលប្រឆាំងនឹងការកើនឡើងនៃថ្លៃចំណាយលើការរស់នៅ និងតម្លៃប្រេងឥន្ធនៈ។
អាជ្ញាធរបារាំងបានឱ្យដឹងកាលពីដើមថ្ងៃចន្ទថា បម្រាមគោចរនៅពេលយប់នឹងត្រូវដាក់អនុវត្តនៅក្នុងក្រុងចំនួន៤នៅភាគខាងជើង រួមមាន Lille, Douai, Wattignies និង Denain សម្រាប់រយៈពេល ២យប់ ដោយមានការយល់ព្រមពីអភិបាលក្រុងនីមួយៗ។
វិធានការរឹតត្បិតទាំងនោះនឹងអនុវត្តចាប់ពីម៉ោង៨ យប់ ដល់ម៉ោង៦ ព្រឹក។
ទីក្រុង Denain ក៏បានដាក់ចេញនូវបម្រាមគោចរនៅពេលយប់ដាច់ដោយឡែកមួយទៀត ចាប់ពីម៉ោង៩ យប់ ដល់ម៉ោង៦ ព្រឹក រហូតដល់ថ្ងៃអាទិត្យ ទី២៥ ខែតុលា។
រដ្ឋមន្ត្រីក្រសួងមហាផ្ទៃ លោក Laurent Nunez បានថ្លែងថា មនុស្សប្រហែល៥៥០,០០០ នាក់បានចូលរួមក្នុងការតវ៉ាចំនួន១១០ លើកនៅទូទាំងប្រទេសបារាំង កាលពីថ្ងៃសៅរ៍។
ក្នុងនោះមាន១១០,០០០ នាក់នៅទីក្រុងប៉ារីស ខណៈដែលមនុស្សប្រហែល៤០០ នាក់ត្រូវបានចាប់ខ្លួននៅទូទាំងប្រទេស។
នាយករដ្ឋមន្ត្រី លោក Sebastien Lecornu បានថ្លែងកាលពីថ្ងៃចន្ទថា លោកបានស្នើឱ្យអាជ្ញាធរតំបន់ (prefects) ដាក់ចេញនូវបម្រាមគោចរក្នុងកម្រិតតំបន់ និងដោយផ្នែក បន្ទាប់ពីមានភាពចលាចលទាំងនេះ។
លោកក៏ បានប្រកាសអំពីប្រតិបត្តិការផ្នែកតុលាការទ្រង់ទ្រាយធំមួយ និងវិធានការទាក់ទងនឹងភាពអត់ការងារធ្វើដោយផ្នែក សម្រាប់អាជីវកម្មនានាដែលរងផលប៉ះពាល់ដោយអំពើហិង្សាទាំងនេះ។
អាជ្ញាធរក៏ បានប្រកាសដាក់ចេញនូវការរឹតត្បិតលើការជួបជុំគ្នានៅក្នុងទីក្រុង Marseille ផងដែរ៕
