នៅថ្ងៃអង្គារទី២០.១០.២០២៦ ក្រុមហ៊ុន Meta បានបដិសេធថា ខ្លួនមិនបានលំអៀង ទៅរកបេក្ខជនប្រធានាធិបតីណាមួយឡើយ ក្នុងការបោះឆ្នោតជុំទីពីរ ដែលនឹងមកដល់នៅប្រទេសប្រេស៊ីល!។
សារព័ត៌មានAnadolu។
ក្រុមហ៊ុនក៏បានជម្រាបទៅកាន់តុលាការបោះឆ្នោតថា ខ្លួនបានដាក់ឱ្យមាននីតិវិធីត្រួតពិនិត្យ ដោយមនុស្សជាកំហិត លើរាល់ការរឹតត្បិតដែលធ្វើឡើងដោយស្វ័យប្រវត្តិ(ដោយប្រព័ន្ធកុំព្យូទ័រ) ទៅលើគណនីផ្សព្វផ្សាយពាណិជ្ជកម្មសម្រាប់ការឃោសនារកសំឡេងឆ្នោត។
ការឆ្លើយតបនេះ ធ្វើឡើងបន្ទាប់ពីមានពាក្យបណ្តឹងពីគណបក្សពលករ(PT) របស់លោក Lula ដែលចោទប្រកាន់ថា Meta បានរឹតត្បិតខ្លឹមសារឃោសនារបស់លោក ។
ខណៈពេលដែលបង្ហាញការលំអៀងទៅរកលោក Flavio Bolsonaro នេះបើយោងតាមការចុះផ្សាយរបស់សារព័ត៌មានប្រេស៊ីល UOL។
ក្រុមហ៊ុន Meta បានបញ្ជាក់ថា រាល់ការរឹតត្បិត លើគណនីផ្សព្វផ្សាយពាណិជ្ជកម្មសម្រាប់ការឃោសនារកសំឡេងឆ្នោត នឹងត្រូវឆ្លងកាត់ការត្រួតពិនិត្យដោយមនុស្សជាកំហិត ក្នុងរយៈពេល២ ម៉ោង រហូតដល់ការបោះឆ្នោតជុំទីពីរនៅថ្ងៃអាទិត្យ។
ក្រុមហ៊ុន បដិសេធថា ខ្លួនមិនបានលំអៀងទៅរកបេក្ខជនរូបណាមួយឡើយ ហើយបានស្នើសុំទៅកាន់តុលាការកុំឱ្យដាក់ពិន័យ ដោយអះអាងថាខ្លួនបានអនុវត្តតាមបញ្ជារបស់តុលាការដោយស្មោះត្រង់។
ជម្លោះនេះកើតឡើងបន្ទាប់ពីមានវិធានការដែលដាក់ចេញដោយតុលាការបោះឆ្នោតជាន់ខ្ពស់ (TSE) ដើម្បីធានាថាបេក្ខជនទាំងអស់ទទួលបានការអនុវត្តដោយស្មើភាពគ្នា។
តុលាការ ក៏បានតម្រូវឱ្យមានការកែសម្រួលលើឧបករណ៍បញ្ញាសិប្បនិម្មិត (AI) របស់ Meta ផងដែរ បន្ទាប់ពីមានក្តីបារម្ភអំពីសមត្ថភាពរបស់ឧបករណ៍ទាំងនោះក្នុងការបង្កើតខ្លឹមសារពាក់ព័ន្ធនឹងការបោះឆ្នោតអំពីបេក្ខជននានា។
ក្រុមហ៊ុន Meta បានឱ្យដឹងថា ខ្លួនបានត្រួតពិនិត្យការបង្ហោះចំនួន១.២០៤ ដែលត្រូវបានសម្គាល់ថាជាខ្លឹមសារបង្កើតឡើងដោយ AI ដោយបានលុប ឬរារាំងការបង្ហោះចំនួន ៧២០ ដោយសារតែការរំលោភលើច្បាប់ស្តីពីការដាក់ស្លាកសម្គាល់ខ្លឹមសារពាក់ព័ន្ធនឹងការបោះឆ្នោត។
ក្នុងចំណោមការបង្ហោះដែលនៅសល់ មាន ២៧០ត្រូវបានដាក់ស្លាកត្រឹមត្រូវ និង ២១៤ ទៀតមិនមែនជាខ្លឹមសារពាក់ព័ន្ធនឹងការបោះឆ្នោតនោះទេ។
ក្រុមហ៊ុនក៏បានដាក់ឱ្យប្រើប្រាស់នូវបញ្ជីអនុញ្ញាត (whitelist) ដែលកំណត់ការផ្សព្វផ្សាយនយោបាយបែបបង់ប្រាក់នៅក្នុងប្រទេសប្រេស៊ីល ឱ្យអនុញ្ញាតតែចំពោះបេក្ខជន គណបក្ស សម្ព័ន្ធនយោបាយ និងសហភាពនយោបាយ ដែលបានចុះបញ្ជីជាមួយ TSE ប៉ុណ្ណោះ។
Meta ពន្យល់ថា ដោយសារតែដែនកំណត់បច្ចេកទេសនៅលើបណ្តាញសង្គម Instagram ក្រុមហ៊ុនចាំបាច់ត្រូវបិទមុខងារណែនាំ (recommendations) សម្រាប់ការបង្ហោះរួមគ្នា (collaborative posts) ទាំងមូល ជាជាងគ្រាន់តែបិទលើប្រវត្តិរូប (profile) របស់បេក្ខជនណាម្នាក់ប៉ុណ្ណោះ។
ក្រុមហ៊ុនបានស្នើសុំកិច្ចប្រជុំបន្ទាន់មួយជាមួយ TSE ដើម្បីពិភាក្សាអំពីបញ្ហាបច្ចេកទេស៕
