គេហទំព័រព័ត៌មានAxios បានរាយការណ៍ថា លោក Steve Witkoff ដែលជាបេសកជនរបស់សេតវិមាន នឹងជួបជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅទីក្រុង St. Petersburg នៅថ្ងៃពុធទី២១.១០.២០២៦ ដើម្បីដាក់សំណើសុំបញ្ចប់សង្គ្រាមនៅអ៊ុយក្រែន។
ដោយដកស្រង់សម្តីមន្ត្រីអាមេរិកម្នាក់ គេហទំព័រព័ត៌មាននេះ បានឱ្យដឹងថា លោក Jared Kushner កូនប្រសាររបស់ប្រធានាធិបតី ដូណាល់ ត្រាំ ក៏នឹងចូលរួមក្នុងកិច្ចប្រជុំនេះតាមរយៈប្រព័ន្ធអនឡាញផងដែរ។
កិច្ចប្រជុំនេះធ្វើឡើង បន្ទាប់ពីលោក Witkoff បានជួបពិភាក្សាជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី។
ខណៈដែលរដ្ឋបាលរបស់លោក ត្រាំ កំពុងខិតខំប្រឹងប្រែងតាមផ្លូវការទូតដើម្បីបញ្ចប់ជម្លោះនេះ។
នាយករដ្ឋមន្ត្រីន័រវែស លោក Jonas Gahr Store បានថ្លែងកាលពីថ្ងៃអង្គារថា លោក Witkoff នឹងធ្វើដំណើរទៅកាន់ទីក្រុង St. Petersburg នៅថ្ងៃពុធ ដើម្បីជួបជាមួយថ្នាក់ដឹកនាំរុស្ស៊ី និងនាំយកគំនិតនានាដែលបានពិភាក្សាជាមួយមេដឹកនាំអ៊ុយក្រែន និងមេដឹកនាំនៃបណ្តាប្រទេសនៅតំបន់ណ័រឌិក (Nordic) នៅក្នុងប្រទេសន័រវែស ទៅជម្រាបជូនភាគីរុស្ស៊ី។
ថ្លែងនៅក្នុងសន្និសីទសារព័ត៌មានមួយនៅទីក្រុង Oslo រួមជាមួយលោក ហ្សេឡេនស្គី និងប្រធានាធិបតីហ្វាំងឡង់ លោក Alexander Stubb លោក Store បាននិយាយថា លោក Witkoff នឹងផ្លាស់ប្តូរទស្សនៈលើសំណើដែលរៀបចំឡើងដោយមន្ត្រីអឺរ៉ុប និងអាមេរិក ដែលអាចជាការបើកផ្លូវឆ្ពោះទៅរកកិច្ចប្រជុំនៅកម្រិតថ្នាក់ដឹកនាំ។
លោក Store បញ្ជាក់ថា កិច្ចពិភាក្សានៅក្នុងប្រទេសន័រវែសគឺ «ល្អ និងមានលក្ខណៈស្ថាបនា»ដោយសង្កត់ធ្ងន់លើសារៈសំខាន់នៃកិច្ចសហប្រតិបត្តិការបន្តទៀត ដើម្បីជំរុញកិច្ចខិតខំប្រឹងប្រែងផ្នែកការទូតឆ្ពោះទៅរកការបញ្ចប់សង្គ្រាមនៅអ៊ុយក្រែន។
លោក ត្រាំ បាននិយាយកាលពីថ្ងៃអង្គារថា សហភាពអឺរ៉ុបកំពុង«អស់ការអត់ធ្មត់ក្នុងការចំណាយ»ប្រាក់លើអ៊ុយក្រែន ហើយបានជំរុញឱ្យលោក ហ្សេឡេនស្គី ឈានដល់កិច្ចព្រមព្រៀងមួយដើម្បីបញ្ចប់សង្គ្រាមជាមួយរុស្ស៊ី។
នៅពេលត្រូវបានសួរថា តើដំណើរការសន្តិភាពបានវិលត្រឡប់ទៅរកផ្លូវត្រូវវិញឬនៅ បន្ទាប់ពីកិច្ចពិភាក្សានៅទីក្រុង Oslo លោកបានឆ្លើយថា៖ «ខ្ញុំគិតថា អ្វីដែលកំពុងកើតឡើងនោះគឺ រុស្ស៊ីចង់បញ្ចប់រឿងនេះ»។
លោកបានបន្ថែមថា៖ «រុស្ស៊ីប្រៀបដូចជាម៉ាស៊ីនដ៏ធំមួយ។ ពួកគេគ្រាន់តែបន្តរុញច្រានទៅមុខឥតឈប់ឈរ។ ពួកគេមានធនធានមនុស្សមិនចេះអស់នោះទេ»៕
