ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី បាននិយាយថា ប្រធានាធិបតីអាមេរិក លោក ដូណាល់ ត្រាំ អាចនាំប្រធានាធិបតីរុស្ស៊ី លោក វ្ល៉ាឌីមៀ ពូទីន មកកាន់តុចរចាដើម្បីបញ្ចប់សង្គ្រាមអ៊ុយក្រែនបានយ៉ាងងាយ ប្រសិនបើលោកត្រាំប្រើសម្ពាធលើរុស្ស៊ីឱ្យបានខ្លាំងដូចដែលលោកបានធ្វើចំពោះអ៊ុយក្រែន។
ប្រភពពីសារព័ត៌មានAA News នៅថ្ងៃទី២៣ខែតុលា។
ក្នុងបទសម្ភាសន៍ជាមួយអ្នកធ្វើផតខាសជនជាតិអង់គ្លេស កាលពីថ្ងៃព្រហស្បតិ៍ លោកហ្សេឡែនស្គីបានរិះគន់លោកត្រាំចំពោះការចោទប្រកាន់ថា លោកជាឧបសគ្គដល់ការសម្រេចបានសន្តិភាព និងការលើកឡើងថា ការវាយប្រហាររបស់អ៊ុយក្រែនលើហេដ្ឋារចនាសម្ព័ន្ធថាមពលរុស្ស៊ី បានធ្វើឱ្យតម្លៃប្រេងឥន្ធនៈនៅអាមេរិកកើនឡើង។
លោកហ្សេឡែនស្គីបានបញ្ជាក់ថា ការវាយប្រហាររបស់អ៊ុយក្រែនលើរោងចក្រថាមពល និងរោងចក្រចម្រាញ់ប្រេងរបស់រុស្ស៊ី គឺជាការឆ្លើយតបទៅនឹងការវាយប្រហាររបស់រុស្ស៊ីលើហេដ្ឋារចនាសម្ព័ន្ធថាមពលរបស់អ៊ុយក្រែន។ លោកក៏បាននិយាយថា លោកបានស្នើឱ្យលោកត្រាំជួយសម្របសម្រួលឱ្យប្រទេសទាំងពីរផ្អាកការវាយប្រហារលើហេដ្ឋារចនាសម្ព័ន្ធថាមពល ប៉ុន្តែមិនទទួលបានលទ្ធផលឡើយ។
លោកបានចាត់ទុកការដែលលោកត្រាំបន្ទោសអ៊ុយក្រែនចំពោះការឡើងថ្លៃប្រេងម៉ាស៊ូតនៅអាមេរិកថា ជារឿងអយុត្តិធម៌ និងជាការបង្វែរការយកចិត្តទុកដាក់ពីបញ្ហាផ្សេងៗ ជាពិសេសស្ថានការណ៍នៅមជ្ឈិមបូព៌ា។
លោកហ្សេឡែនស្គីក៏បានលើកឡើងថា អាមេរិកបានអនុម័តទណ្ឌកម្មថ្មីប្រឆាំងនឹងរុស្ស៊ីរួចហើយ ហើយលោកត្រាំអាចប្រើប្រាស់ទណ្ឌកម្មទាំងនោះដើម្បីដាក់សម្ពាធលើទីក្រុងម៉ូស្គូ ប៉ុន្តែលោកសង្ស័យថា ទំនាក់ទំនងជិតស្និទ្ធរវាងលោកត្រាំ និងលោកពូទីន អាចជាហេតុផលដែលធ្វើឱ្យលោកត្រាំស្ទាក់ស្ទើរក្នុងការអនុវត្តវិធានការទាំងនេះ។
ភាពតានតឹងនៅច្រកសមុទ្រហ័រមូស ដោយសារសង្គ្រាមអ៊ីរ៉ង់ ក៏បានធ្វើឱ្យការដឹកជញ្ជូនប្រេងមានការថយចុះយ៉ាងខ្លាំង និងប៉ះពាល់ដល់តម្លៃប្រេងនៅលើពិភពលោកផងដែរ៕
