សម្ព័ន្ធយោធាដឹកនាំដោយអារ៉ាប៊ីសាអូឌីត បានប្រកាសថា ប្រព័ន្ធការពារដែនអាកាសរបស់ខ្លួនបានស្ទាក់ចាប់ និងបំផ្លាញដ្រូនចំនួន១១គ្រឿង និងមីស៊ីលបាលីស្ទីកមួយគ្រាប់ ដែលត្រូវបានបាញ់សំដៅមកលើប្រទេសអារ៉ាប៊ីសាអូឌីត កាលពីថ្ងៃព្រហស្បតិ៍។
ប្រភពពីសារព័ត៌មានAA News នៅថ្ងៃទី២៣ខែតុលា។
តាមសេចក្តីប្រកាស ដ្រូនទាំងនោះត្រូវបានស្ទាក់ចាប់នៅលើតំបន់រីយ៉ាដ ម៉ាឌីណា តំបន់ភាគខាងកើត និងតំបន់ភាគខាងត្បូង។ ចំណែកមីស៊ីលមួយគ្រាប់ទៀត ត្រូវបានស្ទាក់ចាប់ ខណៈកំពុងធ្វើដំណើរឆ្ពោះទៅកាន់ទីក្រុងណាចរ៉ាន នៅភាគនិរតីនៃប្រទេស។
ការប្រកាសនេះធ្វើឡើងមួយថ្ងៃបន្ទាប់ពីអាជ្ញាធរអារ៉ាប៊ីសាអូឌីតរាយការណ៍ថា មនុស្ស ៤នាក់បានស្លាប់ដោយសារការវាយប្រហារនៅតំបន់ភាគខាងកើត។ ក្នុងនោះ មនុស្ស ២នាក់ស្លាប់ដោយសារបំណែកធ្លាក់ពីលើមេឃ ក្រោយប្រព័ន្ធការពារដែនអាកាសស្ទាក់ចាប់ដ្រូនដែលប៉ុនប៉ងវាយប្រហាររោងចក្រប្រេង Aramco។ មនុស្ស ២នាក់ទៀតស្លាប់ក្នុងការវាយប្រហារលើអាកាសយានដ្ឋានអន្តរជាតិ King Fahd ក្នុងទីក្រុងដាម៉ាម។
ភាពតានតឹងរវាងអារ៉ាប៊ីសាអូឌីត និងក្រុមហ៊ូទីនៅប្រទេសយេម៉ែន បានកើនឡើងចាប់តាំងពីខែកក្កដាមក ខណៈការប្រយុទ្ធគ្នារវាងក្រុមហ៊ូទី និងរដ្ឋាភិបាលយេម៉ែនដែលទទួលស្គាល់ដោយអន្តរជាតិ ក៏បានបន្តកើតមានផងដែរ។
អារ៉ាប៊ីសាអូឌីតបានដឹកនាំសម្ព័ន្ធយោធាមួយ ដើម្បីគាំទ្ររដ្ឋាភិបាលយេម៉ែនប្រឆាំងនឹងក្រុមហ៊ូទី ចាប់តាំងពីខែមីនា ឆ្នាំ២០១៥។ ក្រុមហ៊ូទីបានគ្រប់គ្រងរដ្ឋធានីសាណា និងតំបន់មួយចំនួនទៀតក្នុងប្រទេសយេម៉ែន ចាប់តាំងពីខែកញ្ញា ឆ្នាំ២០១៤៕
