តៃវ៉ាន់បានផ្អាកសកម្មភាពស្ទើរតែទាំងស្រុងនៅថ្ងៃសុក្រ ទី២៣ ខែតុលា ឆ្នាំ២០២៦ ដើម្បីត្រៀមទប់ទល់នឹងព្យុះទីហ្វុង Champi ដែលត្រូវបានព្យាករថា នឹងនាំមកនូវខ្យល់បក់ខ្លាំង និងភ្លៀងធ្លាក់យ៉ាងច្រើន។
ប្រភពពីសារព័ត៌មានCNA។
ទោះបីជាព្យុះនេះកំពុងចុះខ្សោយក៏ដោយ ក៏វានៅតែអាចបោកបក់ចូលដល់កោះតៃវ៉ាន់ដោយផ្ទាល់។ យោងតាមអាជ្ញាធរឧតុនិយមតៃវ៉ាន់ ព្យុះនេះមានល្បឿនខ្យល់បក់ខ្លាំងរហូតដល់ប្រមាណ ១៩១ គីឡូម៉ែត្រក្នុងមួយម៉ោង នៅក្បែរចំណុចកណ្ដាលរបស់វា។
ព្យុះនេះស្ថិតនៅចម្ងាយប្រមាណ ៣២០ គីឡូម៉ែត្រ ពីចុងភាគខាងត្បូងនៃកោះតៃវ៉ាន់ ហើយត្រូវបានព្យាករថា នឹងឆ្លងកាត់នៅជិតភាគឦសាននៃកោះ មុនបត់ទៅភាគខាងជើងឆ្ពោះទៅកាន់ឆ្នេរសមុទ្រចិន និងបន្តទៅភាគខាងត្បូងប្រទេសជប៉ុន។
អាជ្ញាធរតៃវ៉ាន់បានឱ្យដឹងថា គ្រោះធម្មជាតិនេះបានបណ្ដាលឱ្យមនុស្សម្នាក់ស្លាប់ និង ៩៤ នាក់រងរបួស។ មនុស្សប្រមាណ ១.៣០០ នាក់ក៏ត្រូវបានជម្លៀសចេញពីតំបន់ភ្នំទៅកាន់ទីកន្លែងមានសុវត្ថិភាពផងដែរ។
អាជ្ញាធរបានបន្តតាមដានស្ថានការណ៍ និងត្រៀមវិធានការការពារប្រជាពលរដ្ឋពីខ្យល់បក់ខ្លាំង និងភ្លៀងធ្លាក់ដែលអាចបង្កជាគ្រោះទឹកជំនន់ និងគ្រោះថ្នាក់ផ្សេងៗ៕
