រដ្ឋមន្ត្រីក្រសួងមហាផ្ទៃបារាំង លោក ឡូរ៉ង់ នូណេស បានឱ្យដឹងកាលពីថ្ងៃទី២៦ ខែតុលា ឆ្នាំ២០២៦ ថា មនុស្សជាង ៥០០ នាក់បានរងរបួសក្នុងបាតុកម្មរបស់ចលនាអាវកាក់លឿងនៅទូទាំងប្រទេសបារាំង កាលពីថ្ងៃសៅរ៍។
សារព័ត៌មានAnadolu Agency។
ក្នុងចំណោមអ្នករងរបួស មានមន្ត្រីសន្តិសុខ ២៦៧ នាក់ និងបាតុករជាង ២៥០ នាក់។ លោកក៏បានបញ្ជាក់ថា អាជ្ញាធរបានឃាត់ខ្លួនមនុស្សយ៉ាងហោចណាស់ ១.៤៣៥ នាក់ ក្នុងរយៈពេលចុងសប្តាហ៍ ដោយសារការតវ៉ាប្រឆាំងនឹងការកើនឡើងនៃថ្លៃរស់នៅ។ មនុស្ស ៣ នាក់បានរងរបួសធ្ងន់នៅទីក្រុងទូលូស៍ រ៉េមស៍ និងក្លែរម៉ុង-ហ្វេរ៉ង់។
ទោះបីមានអ្នករងរបួស និងការឃាត់ខ្លួនជាច្រើនក៏ដោយ លោករដ្ឋមន្ត្រីបាននិយាយថា មិនមានហេតុការណ៍ធ្ងន់ធ្ងរធំដុំកើតឡើងក្នុងបាតុកម្មថ្ងៃសៅរ៍នោះទេ។ អាជ្ញាធរក៏បានបន្តដាក់បម្រាមគោចរមួយផ្នែកនៅតាមទីតាំងប្រហែល ១០ កន្លែង ដើម្បីទប់ស្កាត់ការរំខានដល់សណ្តាប់ធ្នាប់សាធារណៈ។
ដោយឡែក លោកនូណេសក៏បានថ្កោលទោសការវាយប្រហារមួយនៅទីក្រុងត្រាប កាលពីថ្ងៃសុក្រ ដោយចាត់ទុកថាជាអំពើភេរវកម្មដែលមានមូលហេតុពីការរើសអើងពូជសាសន៍។ លោកបានបញ្ជាក់ថា ជនដៃដល់មានចេតនាសម្លាប់មនុស្សដែលមានដើមកំណើតពីបរទេស ដោយសារការស្អប់ខ្ពើម និងការរើសអើង៕
