តុលាការកំពូលអ៊ីស្រាអែលបានបដិសេធសំណើសុំហាមឃាត់មន្ត្រីការិយាល័យបោះឆ្នោត និងអ្នកតំណាងគណបក្សនយោបាយ មិនឱ្យកាន់អាវុធនៅក្នុងទីតាំងបោះឆ្នោត មុនការបោះឆ្នោតសភាដែលគ្រោងធ្វើឡើងនៅថ្ងៃទី២៧ ខែតុលា ឆ្នាំ២០២៦។
សារព័ត៌មានAnadolu Agency។
ក្រុមសិទ្ធិមនុស្សអារ៉ាប់ Adalah បានឱ្យដឹងថា សំណើនេះត្រូវបានដាក់រួមគ្នាជាមួយគណបក្សរួម (Joint List) ដោយសារមានការព្រួយបារម្ភថា អ្នកសង្កេតការណ៍ប្រដាប់អាវុធអាចបង្កការភ័យខ្លាចដល់អ្នកបោះឆ្នោតអារ៉ាប់ និងបង្កឱ្យមានការប៉ះទង្គិចដោយហិង្សា។
ក្តីបារម្ភនេះកើតឡើង បន្ទាប់ពីគណបក្សលីគូដ (Likud) របស់នាយករដ្ឋមន្ត្រី បេនចាមីន នេតាន់យ៉ាហ៊ូ និងគណបក្សស៊ីយ៉ូននិយមសាសនា (Religious Zionism) របស់រដ្ឋមន្ត្រីហិរញ្ញវត្ថុ បេហ្សាឡែល ស្មូទ្រីច បានប្រកាសផែនការបញ្ជូនអ្នកសង្កេតការណ៍ប្រហែល ២.០០០ នាក់ ទៅកាន់ការិយាល័យបោះឆ្នោតក្នុងទីក្រុង និងតំបន់ដែលមានប្រជាជនអារ៉ាប់រស់នៅ។
រដ្ឋាភិបាលបានលើកឡើងថា មិនមានភស្តុតាងបង្ហាញពីការគំរាមកំហែងជាក់លាក់ ឬផែនការរំខានដល់ការបោះឆ្នោតនោះទេ។ តុលាការបានយល់ស្របតាមការវាយតម្លៃរបស់អាជ្ញាធរប៉ូលិស និងសម្រេចមិនជ្រៀតជ្រែកក្នុងការសម្រេចចិត្តអនុញ្ញាតឱ្យអ្នកតំណាងគណបក្សកាន់អាវុធឡើយ។
ទោះជាយ៉ាងណា ក្រុម Adalah បានរិះគន់សេចក្តីសម្រេចនេះ ដោយបារម្ភថា ការអនុញ្ញាតឱ្យក្រុមអ្នកនយោបាយប្រដាប់អាវុធចូលក្នុងការិយាល័យបោះឆ្នោត អាចបង្កការភ័យខ្លាចដល់អ្នកបោះឆ្នោតអារ៉ាប់។
ការបោះឆ្នោតសភាអ៊ីស្រាអែលលើកនេះ ត្រូវបានគេមើលឃើញថាមានការប្រកួតប្រជែងខ្លាំងរវាងក្រុមលោកនេតាន់យ៉ាហ៊ូ និងគណបក្សប្រឆាំង។ សំឡេងឆ្នោតរបស់ប្រជាជនអារ៉ាប់អាចមានឥទ្ធិពលលើការបែងចែកអាសនៈក្នុងសភា ដែលមានសរុប ១២០ អាសនៈ៕
