យុទ្ធនាការឃោសនាបោះឆ្នោតសភារដ្ឋម៉ាឡាកា លើកទី១៦ បានចាប់ផ្តើមជាផ្លូវការនៅថ្ងៃសៅរ៍ ទី៣១ ខែតុលា ឆ្នាំ២០២៦ ដោយមានបេក្ខជនសរុប ៧៩នាក់ ប្រកួតប្រជែងដណ្តើមអាសនៈចំនួន ២៨។ ការបោះឆ្នោតនឹងប្រព្រឹត្តទៅនៅថ្ងៃទី១៤ ខែវិច្ឆិកា។
សារព័ត៌មានCNA។
ចំណុចគួរឱ្យចាប់អារម្មណ៍ គឺគណបក្ស Pakatan Harapan (PH) របស់នាយករដ្ឋមន្ត្រី អាន់វ៉ា អ៊ីប្រាហ៊ីម និងគណបក្ស Bersatu របស់អតីតនាយករដ្ឋមន្ត្រី មូហ៊ីឌីន យ៉ាស៊ីន បានជៀសវាងការដាក់បេក្ខជនប្រកួតប្រជែងគ្នាដោយផ្ទាល់ក្នុង ៤ អាសនៈ។ អ្នកវិភាគយល់ថា នេះបង្ហាញពីកិច្ចសហការនយោបាយក្រៅផ្លូវការរវាងគណបក្សទាំងពីរ។
អ្នកវិភាគបានលើកឡើងថា ការបោះឆ្នោតនៅរដ្ឋម៉ាឡាកា អាចក្លាយជាការសាកល្បងមួយ ដើម្បីមើលថាតើគណបក្ស Bersatu អាចជួយគណបក្ស PH ទាក់ទាញការគាំទ្រពីប្រជាជនម៉ាឡេបានកម្រិតណា មុនការបោះឆ្នោតសកលលើកទី១៦ របស់ម៉ាឡេស៊ី ដែលត្រូវរៀបចំមិនឱ្យហួសពីខែកុម្ភៈ ឆ្នាំ២០២៨។
សម្រាប់ការបោះឆ្នោតនេះ គណបក្ស PH នឹងដាក់បេក្ខជនប្រកួតប្រជែងក្នុង ២៤ អាសនៈ ខណៈគណបក្ស Bersatu មាន ៧ អាសនៈ។ ចំណែកគណបក្ស Barisan Nasional (BN) នឹងប្រកួតប្រជែងក្នុង ២៣ អាសនៈ និងគណបក្ស Perikatan Nasional (PN) ក្នុង ៥ អាសនៈ។
ទន្ទឹមនឹងនេះ កន្លងមក គណបក្ស MCA ដែលជាសមាជិកនៃសម្ព័ន្ធ BN បានបង្ហាញការមិនពេញចិត្តចំពោះការបែងចែកអាសនៈ។ ប៉ុន្តែក្រោយការចរចានៅនាទីចុងក្រោយ គណបក្សនេះទទួលបានអាសនៈបន្ថែមចំនួនពីរ គឺ Bandar Hilir និង Kota Laksamana។
ការបោះឆ្នោតនេះត្រូវបានគេចាត់ទុកថា ជាការសាកល្បងសំខាន់មួយសម្រាប់កិច្ចសហការរវាងគណបក្សនយោបាយផ្សេងៗ មុនការបោះឆ្នោតសកលនាពេលខាងមុខ៕
