ប្រធានាធិបតីតួកគី លោក Recep Tayyip Erdogan បានបង្ហាញបំណងចង់ពង្រឹងទំនាក់ទំនង និងកិច្ចសហប្រតិបត្តិការជាមួយកូរ៉េខាងត្បូង ជាពិសេសលើវិស័យថាមពលនុយក្លេអ៊ែរ បច្ចេកវិទ្យា ការពារជាតិ និងការដឹកជញ្ជូន។
សារព័ត៌មានAnadolu Agency នៅថ្ងៃទី២ ខែវិច្ឆិកា។
លោក Erdogan បានឱ្យដឹងថា តួកគីកំពុងពិចារណាឱ្យកូរ៉េខាងត្បូងចូលរួមក្នុងគម្រោងសាងសង់រោងចក្រថាមពលនុយក្លេអ៊ែរទី២ នៅទីក្រុង Sinop ជាប់សមុទ្រខ្មៅ។ ប្រទេសទាំងពីរក៏បានសហការសិក្សាលទ្ធភាពនៃគម្រោងនេះរួចមកហើយ ប៉ុន្តែការសម្រេចចិត្តចុងក្រោយនឹងអាស្រ័យលើថ្លៃដើម ការផ្តល់ហិរញ្ញប្បទាន និងផលប្រយោជន៍សេដ្ឋកិច្ច។
ក្រៅពីនេះ តួកគីក៏ចង់ពង្រីកកិច្ចសហប្រតិបត្តិការជាមួយកូរ៉េខាងត្បូងលើបច្ចេកវិទ្យាទំនើប ដូចជា បញ្ញាសិប្បនិម្មិត មនុស្សយន្ត បន្ទះឈីប និងឧស្សាហកម្មការពារជាតិ ព្រមទាំងជំរុញឱ្យក្រុមហ៊ុនកូរ៉េខាងត្បូងបង្កើនការវិនិយោគនៅតួកគី។
លោកក៏បានអំពាវនាវឱ្យក្រុមហ៊ុនកូរ៉េខាងត្បូងចូលរួមវិនិយោគលើហេដ្ឋារចនាសម្ព័ន្ធដឹកជញ្ជូន និងភស្តុភារកម្ម ដើម្បីបង្កើតផ្លូវពាណិជ្ជកម្មជំនួស និងកាត់បន្ថយហានិភ័យពីការរំខានដល់ផ្លូវដឹកជញ្ជូនអន្តរជាតិ ជាពិសេសនៅច្រកសមុទ្រ Hormuz។
ជាមួយគ្នានេះ លោក Erdogan បានកំណត់គោលដៅបង្កើនទំហំពាណិជ្ជកម្មរវាងប្រទេសទាំងពីរឱ្យដល់ ១៥ពាន់លានដុល្លារ។ កាលពីឆ្នាំ២០២៥ តួកគីនាំចេញទំនិញទៅកូរ៉េខាងត្បូងប្រមាណ ១,១៤ពាន់លានដុល្លារ ខណៈការនាំចូលពីកូរ៉េខាងត្បូងមានចំនួន ១០,២៦ពាន់លានដុល្លារ។
លោក Erdogan បានសង្កត់ធ្ងន់ថា ប្រទេសទាំងពីរគួរតែបង្កើនការវិនិយោគទៅវិញទៅមក និងធ្វើឱ្យពាណិជ្ជកម្មមានតុល្យភាពជាងមុន។ ប្រទេសទាំងពីរនឹងប្រារព្ធខួបលើកទី៧០ នៃការបង្កើតទំនាក់ទំនងការទូតនៅឆ្នាំ២០២៧៕
