កាលពីថ្ងៃអង្គារ ទី៣ ខែវិច្ឆិកា ឆ្នាំ២០២៦ យន្តហោះប្រហែល១០គ្រឿងនៅតំបន់អឺរ៉ុបបានរងការគំរាមថាមានគ្រាប់បែក ដែលបង្កឱ្យអាកាសយានដ្ឋានមួយនៅទីក្រុងវ៉ារស្សាវ៉ាប្រទេសប៉ូឡូញ បិទដំណើរការជាបណ្ដោះអាសន្ន និងកងទ័ពអាកាសអ៊ីតាលីបញ្ជូនយន្តហោះចម្បាំងឱ្យហោះអមយន្តហោះដឹកអ្នកដំណើរ។
សារព័ត៌មានYahoo។
ក្រុមហ៊ុនអាកាសចរណ៍ Ryanair របស់អៀរឡង់រងផលប៉ះពាល់ខ្លាំងជាងគេ ដោយមានជើងហោះហើរចំនួន ៤ ទៅកាន់គោលដៅផ្សេងៗរងការគំរាមកំហែង។ ក្រៅពីនេះ យន្តហោះមួយចំនួនដែលធ្វើដំណើរទៅកាន់ទីក្រុងវ៉ារស្សាវ៉ា ក៏ទទួលបានការព្រមានអំពីគ្រាប់បែកផងដែរ។
អាជ្ញាធរបានធ្វើការត្រួតពិនិត្យយ៉ាងហ្មត់ចត់ ប៉ុន្តែមិនបានរកឃើញគ្រឿងផ្ទុះឡើយ ហើយយន្តហោះទាំងអស់បានចុះចតដោយសុវត្ថិភាព។ នៅប្រទេសអ៊ីតាលី យន្តហោះចម្បាំងក៏ត្រូវបានបញ្ជូនឱ្យអមជើងហោះហើរ Ryanair មួយគ្រឿងពីទីក្រុង Dublin ទៅកាន់ទីក្រុងរ៉ូមផងដែរ។
ជាមួយគ្នានេះ កប៉ាល់ទេសចរណ៍មួយគ្រឿងដែលមានអ្នកដំណើរ និងបុគ្គលិកប្រហែល ១.៥០០ នាក់ ត្រូវបានជម្លៀសចេញជាបណ្ដោះអាសន្ននៅកោះ Syros ប្រទេសក្រិក បន្ទាប់ពីមានការគំរាមបំផ្ទុះគ្រាប់បែក។ ក្រោយការត្រួតពិនិត្យ អាជ្ញាធរក៏មិនបានរកឃើញគ្រឿងផ្ទុះដែរ។
អាជ្ញាធរបានបញ្ជាក់ថា ការគំរាមកំហែងទាំងនេះមិនបានបង្កឱ្យមានអ្នកស្លាប់ ឬរបួសនោះទេ៕
