ប្រទេសជាច្រើននៅអឺរ៉ុប ដូចជា បារាំង បែលហ្ស៊ិក អេស្ប៉ាញ អ៊ីតាលី និងអាល្លឺម៉ង់ បានប្រឈមនឹងរលកបាតុកម្មរបស់យុវជន ដោយសារការកើនឡើងនៃតម្លៃជីវភាព ការឡើងថ្លៃលំនៅឋាន ប្រាក់ឈ្នួលទាប និងភាពមិនប្រាកដប្រជានៃការងារ។ យុវជនក៏កំពុងបាត់បង់ទំនុកចិត្តលើស្ថាប័នរដ្ឋ និងប្រព័ន្ធដឹកនាំបែបប្រពៃណីផងដែរ។
សារព័ត៌មានAFP។
ការតវ៉ាបានចាប់ផ្ដើមខ្លាំងនៅពាក់កណ្ដាលខែកញ្ញា នៅពេលសិស្សវិទ្យាល័យបារាំងចេញធ្វើបាតុកម្ម ដើម្បីទាមទារឱ្យមានការកែលម្អសាលារៀន និងសេវាអប់រំ ព្រមទាំងបញ្ចប់ប្រព័ន្ធជ្រើសរើសនិស្សិតចូលសាកលវិទ្យាល័យដែលខ្វះតម្លាភាព។
នៅថ្ងៃទី១៧ ខែតុលា ការតវ៉ានៅប្រទេសបារាំងមានអ្នកចូលរួមយ៉ាងហោចណាស់ ៥៥០.០០០ នាក់។ បន្ទាប់មក នៅថ្ងៃទី២១ ខែតុលា ប្រជាជនជាង ១០.០០០ នាក់បានចូលរួមបាតុកម្មនៅតាមទីក្រុងនានាក្នុងប្រទេសក្រិក។
អ្នកតវ៉ាបានលើកឡើងថា បញ្ហាទាំងនេះមិនមែនជាបញ្ហារបស់ប្រទេសណាមួយតែមួយនោះទេ ប៉ុន្តែជាបញ្ហារួមដែលយុវជននៅប្រទេសជាច្រើនក្នុងទ្វីបអឺរ៉ុបកំពុងជួបប្រទះ៕
