នៅថ្ងៃទី១១ ខែវិច្ឆិកា ឆ្នាំ២០២៦ ប្រទេសអ៊ីរ៉ង់ បានប្រកាសចាត់ទុកកងទ័ពជើងទឹក និងកងទ័ពអាកាសរបស់ប្រទេសអាហ្សង់ទីន ជាអង្គការភេរវកម្ម ដើម្បីជាការឆ្លើយតបចំពោះការសម្រេចរបស់អាហ្សង់ទីន ដែលបានចាត់ទុកកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ជាអង្គការភេរវកម្ម។
សារព័ត៌មានAnadolu Agency។
ក្រសួងការបរទេសអ៊ីរ៉ង់បានបញ្ជាក់ថា ការសម្រេចនេះធ្វើឡើងតាមគោលការណ៍តបត និងច្បាប់ដែលអ៊ីរ៉ង់បានអនុម័តក្នុងឆ្នាំ២០១៩។ អ៊ីរ៉ង់បានចោទប្រកាន់អាហ្សង់ទីនថា បានចាត់វិធានការប្រឆាំងដោយមិនគោរពគោលការណ៍ច្បាប់អន្តរជាតិ។
ជាការឆ្លើយតប អ៊ីរ៉ង់បានព្រមានថា រដ្ឋាភិបាលអាហ្សង់ទីនត្រូវទទួលខុសត្រូវចំពោះផលវិបាកទាំងឡាយដែលអាចកើតឡើងពីការសម្រេចនេះ។
គួរបញ្ជាក់ថា កាលពីថ្ងៃទី៣១ ខែមីនា អាហ្សង់ទីនបានចាត់ទុកកងឆ្មាំបដិវត្តន៍អ៊ីស្លាមអ៊ីរ៉ង់ជាអង្គការភេរវកម្ម ដោយចោទប្រកាន់ថា មានជាប់ពាក់ព័ន្ធនឹងការបំផ្ទុះគ្រាប់បែកដ៏សាហាវពីរលើកនៅទីក្រុង Buenos Aires ក្នុងទសវត្សរ៍ឆ្នាំ១៩៩០។ ទោះជាយ៉ាងណា អ៊ីរ៉ង់បានបដិសេធការចោទប្រកាន់នេះ។
ការសម្រេចចិត្តថ្មីនេះកើតឡើងបន្ទាប់ពីអ៊ីរ៉ង់បានចាត់ទុកកងទ័ពជើងទឹក និងកងទ័ពអាកាសអង់គ្លេសជាអង្គការភេរវកម្ម កាលពីថ្ងៃទី១ ខែវិច្ឆិកា ដើម្បីឆ្លើយតបនឹងវិធានការរបស់អង់គ្លេសប្រឆាំងនឹងកងឆ្មាំបដិវត្តន៍អ៊ីស្លាមអ៊ីរ៉ង់៕
