ក្រុមឧទ្ទាមហ៊ូទីនៅប្រទេសយេម៉ែន អះអាងកាលពីថ្ងៃទី១២ ខែវិច្ឆិកា ថាខ្លួនបានបើកការវាយប្រហារលើទីតាំងបូមប្រេងមួយកន្លែងនៃបំពង់បង្ហូរប្រេង East-West របស់ប្រទេសអារ៉ាប៊ីសាអូឌីត ព្រមទាំងទីតាំងប្រេងនៅទីក្រុងយ៉ាន់ប៊ូ និងអគារមួយរបស់ក្រុមហ៊ុនប្រេង Aramco នៅរដ្ឋធានីរីយ៉ាដ។
សារព័ត៌មានReuter។
ជាការឆ្លើយតប សម្ព័ន្ធយោធាដឹកនាំដោយអារ៉ាប៊ីសាអូឌីត ដែលកំពុងប្រយុទ្ធប្រឆាំងនឹងក្រុមហ៊ូទី បានប្រកាសថា ខ្លួនបានស្ទាក់ចាប់ និងបំផ្លាញយន្តហោះដ្រូនរបស់ក្រុមហ៊ូទីចំនួន២គ្រឿង។ ដ្រូនមួយគ្រឿងត្រូវបានស្ទាក់ចាប់នៅតំបន់រីយ៉ាដ និងមួយគ្រឿងទៀតនៅខេត្តភាគខាងកើតរបស់ប្រទេស។
គួរបញ្ជាក់ថា បំពង់បង្ហូរប្រេង East-West គឺជាហេដ្ឋារចនាសម្ព័ន្ធដ៏សំខាន់របស់អារ៉ាប៊ីសាអូឌីត សម្រាប់ដឹកជញ្ជូនប្រេងពីភាគខាងកើតទៅកាន់ឆ្នេរសមុទ្រក្រហម។ ការវាយប្រហារលើទីតាំងប្រេងទាំងនេះអាចបង្កការព្រួយបារម្ភដល់សន្តិសុខថាមពល និងការផ្គត់ផ្គង់ប្រេងក្នុងតំបន់។
ទន្ទឹមនឹងនេះ ក្រុមហ៊ូទីក៏បានបដិសេធការចោទប្រកាន់ថា ខ្លួនបានកំណត់គោលដៅវាយប្រហារទីក្រុងមេកា ផងដែរ៕
