សភាយេម៉ែន បានអនុម័តច្បាប់ដោយកំណត់ក្រុមហ៊ូទីថា ជាអង្គការភេរវកម្ម!

កាលពីថ្ងៃទី១៦ ខែវិច្ឆិកា ឆ្នាំ២០២៦ សភាប្រទេសយេម៉ែន បានអនុម័តជាឯកច្ឆន្ទលើសេចក្តីព្រាងច្បាប់មួយ ដើម្បីកំណត់ក្រុមហ៊ូទី (Houthis) ជាអង្គការភេរវកម្មនិងដាក់ទោសចំពោះសកម្មភាពគាំទ្រ ផ្តល់ហិរញ្ញប្បទាន និងផ្គត់ផ្គង់អាវុធដល់ក្រុមនេះ។

សារព័ត៌មានAnadolu Agency។

សេចក្តីព្រាងច្បាប់ដែលមាន ៥៥ មាត្រា ក្នុង ៩ ជំពូក ត្រូវបានពិភាក្សារយៈពេលពីរថ្ងៃ មុនពេលសមាជិកសភាបោះឆ្នោតអនុម័តតាមប្រព័ន្ធវីដេអូ។ បច្ចុប្បន្ន ច្បាប់នេះត្រូវបញ្ជូនទៅលោក រ៉ាសាដ អាល់អាលីមី (Rashad al-Alimi) ប្រធានក្រុមប្រឹក្សាភាពជាអ្នកដឹកនាំប្រធានាធិបតី ដើម្បីចុះអនុវត្តជាផ្លូវការ។
ច្បាប់នេះកំណត់ទោសធ្ងន់ធ្ងរ រហូតដល់ទោសប្រហារជីវិតចំពោះបទល្មើសមួយចំនួន ដូចជា ការដណ្តើមកាន់កាប់ស្ថាប័នរដ្ឋ ការឡោមព័ទ្ធទីក្រុង និងធ្វើឱ្យប្រជាជនខ្វះអាហារ ការវាយប្រហារលើជនស៊ីវិល និងនាវាចរណ៍អន្តរជាតិ ការដាក់មីន ការជ្រើសរើសកុមារឱ្យចូលរួមក្នុងសង្គ្រាម ការចាប់ជំរិត និងការបាត់ខ្លួនដោយបង្ខំ។
បន្ថែមពីនេះ ច្បាប់ក៏អនុញ្ញាតឱ្យអាជ្ញាធរតាមដាន បង្កក និងរឹបអូសទ្រព្យសម្បត្តិដែលពាក់ព័ន្ធនឹងក្រុមហ៊ូទី ព្រមទាំងជំរុញកិច្ចសហប្រតិបត្តិការផ្នែកច្បាប់ជាមួយប្រទេសផ្សេងៗ ដើម្បីប្រយុទ្ធប្រឆាំងនឹងការផ្តល់ហិរញ្ញប្បទាន និងការផ្គត់ផ្គង់អាវុធដល់ក្រុមនេះ។
ការអនុម័តច្បាប់នេះកើតឡើង ខណៈការប្រយុទ្ធគ្នានៅយេម៉ែនបានកើនឡើងជាថ្មីចាប់តាំងពីខែកក្កដា បន្ទាប់ពីមានភាពស្ងប់ស្ងាត់មួយរយៈ ក្រោយបទឈប់បាញ់ដែលសម្របសម្រួលដោយអង្គការសហប្រជាជាតិ កាលពីខែមេសា ឆ្នាំ២០២២។

គួររំឭកថា ក្រុមហ៊ូទីបានដណ្តើមកាន់កាប់រដ្ឋធានីសាណា និងតំបន់មួយចំនួនទៀតក្នុងប្រទេសយេម៉ែន កាលពីខែកញ្ញា ឆ្នាំ២០១៤។ បន្ទាប់មក សម្ព័ន្ធយោធាដឹកនាំដោយអារ៉ាប៊ីសាអូឌីតបានចូលធ្វើអន្តរាគមន៍នៅខែមីនា ឆ្នាំ២០១៥ ដើម្បីគាំទ្ររដ្ឋាភិបាលយេម៉ែន៕

Leave a Reply

Your email address will not be published. Required fields are marked *