ជនជាតិអ៊ីស្រាអែល សម្លាប់ស្ត្រីប៉ាឡេស្ទីនម្នាក់និងបង្ករបួសមនុស្ស១០នាក់នៅតំបន់វេសប៊ែង!

ស្ត្រីប៉ាឡេស្ទីនម្នាក់អាយុ៦០ឆ្នាំ ត្រូវបានខ្មាន់កាំភ្លើងជនជាតិអ៊ីស្រាអែលបាញ់សម្លាប់ និងមនុស្ស១០នាក់ផ្សេងទៀតរងរបួស នៅជិតទីក្រុងយេរីខូ (Jericho) ក្នុងតំបន់វេសប៊ែង ដែលកាន់កាប់ដោយអ៊ីស្រាអែល កាលពីព្រឹកថ្ងៃអង្គារ ទី១៧ ខែវិច្ឆិកា ឆ្នាំ២០២៦។

សារព័ត៌មានAnadolu Agency។

តាមរបាយការណ៍របស់ប៉ាឡេស្ទីន ក្រុមប្រដាប់អាវុធជនជាតិអ៊ីស្រាអែលបានឡោមព័ទ្ធផ្ទះប្រជាជនប៉ាឡេស្ទីនក្នុងភូមិ អាល់ឌូយុក អាល់តាថា (Al-Duyuk al-Tahta) ហើយបើកការបាញ់ប្រហារទៅលើអ្នករស់នៅទីនោះ។ ក្នុងចំណោមអ្នករងរបួស មានបុរសម្នាក់អាយុ ៦៥ឆ្នាំផងដែរ។
កងកម្លាំងអ៊ីស្រាអែលក៏បានចូលទៅក្នុងតំបន់កើតហេតុ និងដាក់របាំងបិទផ្លូវ។ ចំណែកកងទ័ពអ៊ីស្រាអែលបាននិយាយថា ខ្លួនទទួលបានព័ត៌មានដំបូងអំពីការប៉ុនប៉ងវាយប្រហារមួយនៅតំបន់យេរីខូ ប៉ុន្តែកំពុងពិនិត្យព័ត៌មានលម្អិតបន្ថែម។
ហេតុការណ៍នេះកើតឡើងមួយថ្ងៃបន្ទាប់ពីមានការវាយប្រហារមួយទៀតនៅទីក្រុងទូគូ (Tuqu) ភាគអាគ្នេយ៍នៃទីក្រុងបេថ្លេហិម ដែលជនជាតិអ៊ីស្រាអែលម្នាក់បានបើករថយន្តបុកប្រជាជនប៉ាឡេស្ទីន បណ្តាលឱ្យមនុស្ស ៨នាក់រងរបួស រួមទាំងអ្នកដែលបានចូលទៅជួយជនរងគ្រោះផងដែរ។
ក្រសួងការបរទេសប៉ាឡេស្ទីនបានថ្កោលទោសការវាយប្រហារនេះ និងចាត់ទុកថាជាអំពើភេរវកម្ម ព្រមទាំងទាមទារឱ្យមានការទទួលខុសត្រូវចំពោះអ្នកប្រព្រឹត្ត និងអ្នកដែលផ្តល់ការការពារដល់ជននោះ៕

Leave a Reply

Your email address will not be published. Required fields are marked *