សហរដ្ឋអាមេរិកកំពុងប្រឈមមុខនឹងព្យុះរដូវរងាដ៏សាហាវមួយ ដែលមានប្រវែងប្រមាណ 2,000 ម៉ាយ បោកបក់ពីភាគខាងត្បូងទៅដល់ភាគឦសាន បណ្ដាលឲ្យមានអ្នកស្លាប់យ៉ាងហោចណាស់ 29 នាក់ និងរំខានយ៉ាងធ្ងន់ធ្ងរដល់ការធ្វើដំណើរ និងសេវាអគ្គិសនី។
ប្រភពពីសារព័ត៌មានABC នៅថ្ងៃទី២៧ខែមករា។
យោងតាមសារព័ត៌មាន Associated Press ការស្លាប់ត្រូវបានរាយការណ៍នៅរដ្ឋជាច្រើន រួមមាន Texas, New York, Pennsylvania, Tennessee, Louisiana និង Massachusetts។ មូលហេតុនៃការស្លាប់ភាគច្រើនពាក់ព័ន្ធនឹងគ្រោះថ្នាក់ចរាចរណ៍ និងសីតុណ្ហភាពរាងកាយទាប។
ព្យុះនេះក៏បានបណ្តាលឲ្យជើងហោះហើរជាង 20,000 ត្រូវបានលុបចោលចាប់តាំងពីថ្ងៃសុក្រ ដោយថ្ងៃអាទិត្យមានការលុបចោលខ្ពស់បំផុតជាង 11,000 ជើងហោះហើរ ដែលជាចំនួនខ្ពស់បំផុតចាប់តាំងពីសម័យជំងឺរាតត្បាត។
លើសពីនេះ អតិថិជនជាង 650,000 នាក់នៅរដ្ឋ Tennessee, Mississippi, Louisiana និង Texas នៅតែគ្មានអគ្គិសនីប្រើប្រាស់។ ក្រុមហ៊ុនផ្គត់ផ្គង់អគ្គិសនីបានបង្កើនកម្លាំងបុគ្គលិក ដើម្បីស្តារបណ្តាញអគ្គិសនីឡើងវិញឲ្យបានឆាប់រហ័ស។
អាជ្ញាធរបានអំពាវនាវឲ្យប្រជាពលរដ្ឋប្រុងប្រយ័ត្នជាពិសេសក្នុងពេលធ្វើដំណើរ ខណៈដែលស្ថានភាពអាកាសធាតុត្រជាក់ខ្លាំងនៅតែបន្តគំរាមកំហែងដល់សុវត្ថិភាពសាធារណៈ៕