ស្ថាប័នរដ្ឋាភិបាលប៉ាឡេស្ទីន មួយបានឱ្យដឹងកាលពីថ្ងៃចន្ទទី០២.១១.២០២៦ថា កងទ័ពអ៊ីស្រាអែល និងក្រុមអ្នកកាន់កាប់ទឹកដី បានធ្វើការវាយប្រហារចំនួន៣,១៣៣ លើកនៅទូទាំងតំបន់វេសប៊ែង ក្នុងខែតុលា ដែលជាចំនួនកើនឡើង ៥២,៨%បើធៀបនឹងខែកញ្ញា។
សារព័ត៌មានAnadolu។
នៅក្នុងរបាយការណ៍ប្រចាំខែ របស់ខ្លួន គណៈកម្មការប្រឆាំងការតាំងទីលំនៅ និងជញ្ជាំង (Colonization and Wall Resistance Commission) បានបញ្ជាក់ថា កងកម្លាំងអ៊ីស្រាអែលបានធ្វើការវាយប្រហារចំនួន១,៧៦៤ លើក ខណៈដែលក្រុមអ្នកកាន់កាប់ទឹកដីបានបង្កការវាយប្រហារចំនួន ១,៣៦៩លើក។
គណៈកម្មការនិយាយថា ការវាយប្រហារ ដោយក្រុមអ្នកកាន់កាប់ទឹកដីអ៊ីស្រាអែល បានកើនឡើង ១១១,៦%បើធៀបនឹងខែកញ្ញា ដែលកាលនោះមានការវាយប្រហារចំនួន ៦៤៧លើក។
ការវាយប្រហារទាំងនោះ រួមមាន ការបាញ់ប្រហារ និងការប្រើហិង្សាលើរាងកាយប្រឆាំងនឹងជនជាតិប៉ាឡេស្ទីន ការបំផ្លិចបំផ្លាញទ្រព្យសម្បត្តិ និងដីកសិកម្ម ការដុតបំផ្លាញដើមឈើ និងយានយន្ត ព្រមទាំងការរឹបអូសយកទ្រព្យសម្បត្តិ។
គណៈកម្មការដដែលបន្ថែមថា ហេតុការណ៍ទាំងនេះក៏រួមបញ្ចូលផងដែរនូវការបិទផ្លូវ និងការរារាំងមិនឱ្យជនជាតិប៉ាឡេស្ទីនចូលទៅកាន់ដីធ្លីរបស់ពួកគេ។
របាយការណ៍នេះ ចេញផ្សាយក្នុងពេលដែលសកម្មភាពយោធារបស់អ៊ីស្រាអែល និងអំពើហិង្សាដោយក្រុមអ្នកកាន់កាប់ទឹកដី កំពុងកើនឡើងកាន់តែខ្លាំងនៅទូទាំងតំបន់វេសប៊ែង រួមទាំងក្រុងយេរូសាឡឹមខាងកើត (East Jerusalem) ផងដែរ ចាប់តាំងពីសង្គ្រាមរបស់អ៊ីស្រាអែលនៅក្នុងតំបន់ហ្គាហ្សា (Gaza Strip) បានចាប់ផ្តើមក្នុងខែតុលា ឆ្នាំ២០២៣។
ក្នុងរយៈពេលនេះដែរ ក៏មានការបង្កើនការចុះឆែកឆេរ ការរឹតត្បិតការធ្វើដំណើរ ការរឹបអូសយកដីធ្លី ការបង្ខំឱ្យសហគមន៍ប៉ាឡេស្ទីនចាកចេញពីលំនៅឋាន និងការបន្តពង្រីកការតាំងទីលំនៅខុសច្បាប់ ព្រមទាំងប៉ុស្តិ៍តាំងទីលំនៅនានានៅទូទាំងទឹកដីដែលកំពុងស្ថិតក្រោមការកាន់កាប់។
នៅក្នុងមតិយោបល់ផ្លូវច្បាប់ដ៏សំខាន់មួយកាលពីខែកក្កដា ឆ្នាំ២០២៤ តុលាការយុត្តិធម៌អន្តរជាតិ (International Court of Justice) បានប្រកាសថា ការកាន់កាប់ទឹកដីប៉ាឡេស្ទីនដោយអ៊ីស្រាអែលគឺជារឿងខុសច្បាប់ ហើយបានអំពាវនាវឱ្យមានការដកចេញនូវរាល់ការតាំងទីលំនៅទាំងអស់នៅក្នុងតំបន់វេសប៊ែង និងក្រុងយេរូសាឡឹមខាងកើត៕
