ប្រធានាធិបតីអ៊ុយក្រែន លោក Volodymyr Zelensky បានប្រកាសកាលពីថ្ងៃអាទិត្យទី១ ខែវិច្ឆិកា ឆ្នាំ២០២៦ថា កងកម្លាំងការពារជាតិអ៊ុយក្រែន បានរំដោះទឹកដីអធិបតេយ្យចំនួន៩៦,២ គីឡូម៉ែត្រការ៉េ ក្នុងខែតុលា ដែលចំនួននេះលើសពីទំហំទឹកដីដែលរុស្ស៊ី ដណ្តើមកាន់កាប់បានចំនួន១០,៤ គីឡូម៉ែត្រការ៉េ។
ជាមួយគ្នានេះ កងកម្លាំងអ៊ុយក្រែនក៏បានធ្វើឱ្យកងទ័ពរុស្ស៊ី រងការខាតបង់ធ្ងន់ធ្ងរមិនធ្លាប់មានពីមុនមក ដោយមានទាហានរុស្ស៊ីចំនួន៥៤.៤០០ នាក់បានស្លាប់ ឬរងរបួសធ្ងន់។
សារព័ត៌មានKyiv post ។
តាមរយៈសារនៅលើបណ្តាញ Telegram លោកប្រធានាធិបតី បានបង្ហាញរបាយការណ៍ប្រចាំខែ ដែលបញ្ជាក់ថា កងកម្លាំងអ៊ុយក្រែន បានដណ្តើមយកទឹកដីមកវិញច្រើនជាងចំនួនទឹកដីដែលកងទ័ពរុស្ស៊ីបានដណ្តើមកាន់កាប់ក្នុងរយៈពេល ៣១ ថ្ងៃដូចគ្នានេះ។
លើសពីនេះ អ៊ុយក្រែន ក៏បានបង្កឱ្យមានចំនួនអ្នកស្លាប់ និងរបួសខ្ពស់បំផុតក្នុងរយៈពេលមួយខែ ចាប់តាំងពីការឈ្លានពានទ្រង់ទ្រាយធំបានចាប់ផ្តើមក្នុងខែកុម្ភៈ ឆ្នាំ២០២២មក។
លោក Zelensky ថ្លែងថា៖ «នៅក្នុងខែតុលា កងកម្លាំងការពារជាតិអ៊ុយក្រែនរបស់យើង បានបង្កការខាតបង់កម្រិតខ្ពស់បំផុតដល់សត្រូវ ហើយបានដណ្តើមយកទឹកដីមកវិញច្រើនជាងចំនួនទឹកដីដែលកងទ័ពរុស្ស៊ីអាចដណ្តើមកាន់កាប់បាន»។
យោងតាមទិន្នន័យ ដែលលោកប្រធានាធិបតីបានបង្ហាញ កងទ័ពរុស្ស៊ីមានទាហានចំនួន៥៤.៤០០នាក់បានស្លាប់ ឬរងរបួសធ្ងន់ធ្ងរក្នុងអំឡុងខែនេះ។
ក្នុងចំណោមនោះ នៅថ្ងៃទី២១ ខែតុលា កងទ័ពរុស្ស៊ីបានរងការខាតបង់ធ្ងន់ធ្ងរបំផុតក្នុងរយៈពេលតែមួយថ្ងៃ ដោយមានទាហានរុស្ស៊ីចំនួន២.២៥០ នាក់បានស្លាប់ ឬរងរបួសក្នុងរយៈពេល ២៤ម៉ោង។
លោក Zelensky បានសង្កត់ធ្ងន់ថា៖ «វាជារឿងសំខាន់ណាស់ ដែលយើងត្រូវបន្តដណ្តើមយកអ្វីដែលជារបស់យើងមកវិញ»៕
