លោកស្រី Delcy Rodriguez ប្រធានាធិបតីស្តីទីនៃប្រទេសវេណេស៊ុយអេឡា បានចុះហត្ថលេខាលើច្បាប់កំណែទម្រង់វិស័យប្រេងថ្មីមួយ ដែលបើកផ្លូវឱ្យមានការវិនិយោគពីបរទេសកាន់តែច្រើន ក្នុងវិស័យប្រេងជាតិដ៏សំខាន់របស់ប្រទេស។
ប្រភពពីសារព័ត៌មានAl Jazeera នៅថ្ងៃទី៣០ខែមករា។
ពិធីចុះហត្ថលេខានេះធ្វើឡើងបន្ទាប់ពីរដ្ឋសភា ដែលគ្រប់គ្រងដោយគណបក្សសង្គមនិយមរួបរួម បានអនុម័តច្បាប់ក្នុងរយៈពេលប៉ុន្មានម៉ោង។ លោកស្រី Rodriguez បានអះអាងថា កំណែទម្រង់នេះជាជំហានវិជ្ជមានសម្រាប់អនាគតសេដ្ឋកិច្ច និងជីវភាពរបស់ប្រជាជនវេណេស៊ុយអេឡា។
ការកែប្រែច្បាប់នេះកើតឡើងក្នុងបរិបទនៃសម្ពាធពីសហរដ្ឋអាមេរិក ដែលបានបន្ធូរបន្ថយទណ្ឌកម្មមួយចំនួន ហើយទាមទារឱ្យវេណេស៊ុយអេឡាបើកការចូលប្រើប្រាស់ប្រេងបម្រុងដ៏ធំរបស់ខ្លួនសម្រាប់បរទេស។ រដ្ឋបាលលោក Donald Trump បានចាត់ទុកកំណែទម្រង់នេះថាជាលក្ខខណ្ឌសំខាន់សម្រាប់ការស្តារទំនាក់ទំនងសេដ្ឋកិច្ចឡើងវិញ៕