ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) បានអនុវត្តវិធានការរឹតត្បិតយ៉ាងតឹងរ៉ឹងនៅតំបន់ហ្គាហ្សា ដោយបញ្ឈប់បុគ្គលិកប្រហែល ៦០០ នាក់ កាត់បន្ថយប្រាក់ខែបុគ្គលិកក្នុងស្រុក ២០ ភាគរយ និងកាត់បន្ថយម៉ោងធ្វើការ ខណៈដែលការចូលប្រើប្រាស់ជំនួយមនុស្សធម៌ត្រូវបានរឹតត្បិតបន្ថែមទៀត។
ប្រភពពីសារព័ត៌មានAl Jazeera នៅថ្ងៃទី៣០ខែមករា។
UNRWA បានបញ្ជាក់ថា វិធានការទាំងនេះកើតចេញពីឱនភាពថវិកាឆ្នាំ ២០២៦ ប្រមាណ ២២០ លានដុល្លារ ដែលគំរាមកំហែងដល់សមត្ថភាពរបស់ទីភ្នាក់ងារក្នុងការបន្តផ្តល់សេវាទាំងការអប់រំ សុខាភិបាល និងជំនួយបន្ទាន់សម្រាប់ជនភៀសខ្លួន។
ការកាត់បន្ថយនេះកើតឡើងនៅពេលដែលប្រជាជនហ្គាហ្សាកំពុងប្រឈមមុខនឹងវិបត្តិមនុស្សធម៌ធ្ងន់ធ្ងរ ដោយសារការវាយប្រហារនិងការឡោមព័ទ្ធបន្តរបស់អ៊ីស្រាអែល ដែលបានបំផ្លាញហេដ្ឋារចនាសម្ព័ន្ធស៊ីវិល និងរារាំងការចូលដំណើរការជំនួយសំខាន់ៗ ខណៈអង្គការអន្តរជាតិព្រមានថា ស្ថានភាពមនុស្សធម៌កំពុងធ្លាក់ចុះយ៉ាងគ្រោះថ្នាក់៕