កងទ័ពGaitanist នៃប្រទេសកូឡុំប៊ី (EGC) ដែលជាអង្គការឧក្រិដ្ឋជនធំបំផុតរបស់ប្រទេស បានប្រកាសផ្អាកការចរចាសន្តិភាពជាបណ្តោះអាសន្ននៅទីក្រុងដូហា របស់ប្រទេសកាតា បន្ទាប់ពីមានរបាយការណ៍ថា រដ្ឋាភិបាលកូឡុំប៊ី និងសហរដ្ឋអាមេរិក នឹងកំណត់គោលដៅចាប់ខ្លួនមេដឹកនាំរបស់ខ្លួន។
ប្រភពពីសារព័ត៌មានAl Jazeera នៅថ្ងៃទី៥ខែកុម្ភៈ។
ក្នុងសេចក្តីថ្លែងការណ៍មួយនៅលើបណ្តាញសង្គម X កាលពីថ្ងៃពុធ EGC បានបញ្ជាក់ថា គណៈប្រតិភូរបស់ខ្លួននឹងផ្អាកការចរចា ដើម្បីពិនិត្យ និងបញ្ជាក់ភាពត្រឹមត្រូវនៃព័ត៌មានពីរដ្ឋបាលប្រធានាធិបតី Gustavo Petro។ ក្រុមនេះបានព្រមានថា ប្រសិនបើរបាយការណ៍នោះពិតប្រាកដ វានឹងជាការរំលោភលើសុច្ឆន្ទៈ និងការប្តេជ្ញាចិត្តនៃដំណើរការចរចានៅទីក្រុងដូហា។
ការប្រកាសនេះកើតឡើងបន្ទាប់ពីកិច្ចប្រជុំបិទទ្វារនៅសេតវិមាន រវាងប្រធានាធិបតីកូឡុំប៊ី Gustavo Petro និងប្រធានាធិបតីអាមេរិក Donald Trump ដែលលោក Trump បានបន្តដាក់សម្ពាធឲ្យកូឡុំប៊ីចាត់វិធានការតឹងរឹងជាងមុន ដើម្បីប្រយុទ្ធប្រឆាំងការជួញដូរគ្រឿងញៀន៕