រដ្ឋមន្ត្រីការបរទេសអាមេរិក Marco Rubio និងរដ្ឋមន្ត្រីការបរទេសកូរ៉េខាងត្បូង Cho Hyun យល់ព្រមថាច្រកសមុទ្រHormuz មានសារៈសំខាន់យ៉ាងខ្លាំងសម្រាប់សេដ្ឋកិច្ចពិភពលោក និងស្ថិរភាពតម្លៃប្រេង។
ប្រភពពីសារព័ត៌មានReuterនៅថ្ងៃទី១៧ខែមីនា។
កិច្ចពិភាក្សានេះកើតឡើងនៅពេលមានភាពតានតឹងខ្ពស់ក្នុងតំបន់មជ្ឈិមបូព៌ា បន្ទាប់ពីការវាយប្រហាររវាងសហរដ្ឋអាមេរិក និងអ៊ីរ៉ង់ ដែលបណ្តាលឲ្យចរាចរណ៍ប្រេងតាមច្រកសមុទ្រនេះត្រូវបានរំខាន។ ច្រកសមុទ្រនេះជាផ្លូវដឹកជញ្ជូនថាមពលសំខាន់ ដែលផ្ទុកប្រហែល 20% នៃប្រេង និងឧស្ម័នពិភពលោក។
ប្រធានាធិបតី Donald Trump បានអំពាវនាវឲ្យសម្ព័ន្ធមិត្ត រួមទាំងកូរ៉េខាងត្បូង ចូលរួមក្នុងប្រតិបត្តិការកងទ័ពជើងទឹក ដើម្បីការពារសុវត្ថិភាពនាវាចរណ៍នៅតំបន់នេះ។ ទោះយ៉ាងណា កូរ៉េខាងត្បូងមិនទាន់សម្រេចចិត្ត និងបញ្ជាក់ថាការដាក់ពង្រាយកងទ័ពត្រូវការការយល់ព្រមពីសភាជាមុន៕