ក្រុមអ្នកប្រឆាំងនយោបាយនៅប្រទេសអ៊ីរ៉ង់ បានប្រមូលផ្តុំគ្នារិះគន់អតីតរដ្ឋមន្ត្រីការបរទេស លោកMohammad Javad Zarif ដោយហៅលោកថាជនក្បត់ជាតិ បន្ទាប់ពីលោកអំពាវនាវឱ្យបញ្ចប់សង្គ្រាម និងបន្ថយភាពតានតឹងក្នុងតំបន់។
ប្រភពពីសារព័ត៌មានIran International នៅថ្ងៃទី៤ខែមេសា។
សមាជិកសភារឹងរូស Hamid Rasaei បានជំរុញឱ្យតុលាការចាប់ខ្លួនលោក Zarif និងអតីតប្រធានាធិបតី Hassan Rouhani បន្ទាប់ពីអ្នកទាំងពីរបានអំពាវនាវឱ្យរកវិធីបញ្ចប់សង្គ្រាម «ដោយកិត្តិយស»។
ការរិះគន់នេះកើតឡើងក្នុងបរិយាកាសតានតឹងនៅទីក្រុង Tehran ដែលមានការបាតុកម្មគាំទ្ររដ្ឋ។ ក្នុងព្រឹត្តិការណ៍មួយ ក្រុមបាតុករបានដុតរូបថតរបស់លោក Zarif និងកាន់បដាដែលចោទប្រកាន់ថាលោក និង Rouhani ជាភ្នាក់ងាររបស់សហរដ្ឋអាមេរិក។
ស្ថានការណ៍នេះបង្ហាញពីភាពបែកបាក់នយោបាយនៅក្នុងអ៊ីរ៉ង់ ខណៈសង្គ្រាម និងភាពតានតឹងក្នុងតំបន់នៅតែបន្តកើនឡើង៕