(ភ្នំពេញ)៖ លោកវរសេនីយ៍ត្រី គង់ វីរៈ មន្ត្រីកងរាជអាវុធហត្ថ ខេត្តសៀមរាប បានធានារត់ការឱ្យយុវជនម្នាក់ ចូលក្របខ័ណ្ឌទាហាន នៃកងរាជអាវុធហត្ថលើផ្ទៃប្រទេស ជាថ្នូរនឹងលុយចំនួន១០.៥០០$(មួយម៉ឺនប្រាំរយដុល្លារ)។
លុះជនរងគ្រោះពុំបានចូលក្របខ័ណ្ឌ ដូចការគ្រោងទុក ម្ចាស់ប្រាក់ក៏តាមទារលុយវិញ.!។
ក្នុងនោះលោក គង់ វីរៈ សងប្រាក់ក្នុងស្ថានភាពរដិបរដុបម្ដងបន្តិចៗ ហើយនៅខ្វះ៣.៥០០ដុល្លារទៀត ទាក់ទងលែងបានតែម្ដង.!!។
*នេះបើយោងតាមកិច្ចសន្យាប្រគល់ប្រាក់ ចុះថ្ងៃទី២៤ ខែកុម្ភៈ ឆ្នាំ២០២៣ និងការលើកឡើងដោយផ្ទាល់ពីម្ចាស់ប្រាក់..!។
*ទាក់ទិនរឿងនេះពលរដ្ឋឈ្មោះ សុក សុផល ភេទប្រុសអាយុ៥៩ឆ្នាំ នៅភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ បានអះអាងប្រាប់”ដើមរាំង”នៅថ្ងៃទី២២.០៤.២០២៦ថា ដំបូងឡើយ កាលពីអំឡុងដើមឆ្នាំ២០២៣ ខ្លួននិងលោកវរសេនីយ៍ត្រី គង់ វីរៈ បានទំនាក់ទំនងនិងស្គាល់គ្នា..!។
ទន្ទឹមនិងនោះ លោក គង់ វីរៈ បាននិយាយបញ្ចុះបញ្ចូលនិងធានាថា រូបគាត់អាចបញ្ចូលក្របខ័ណ្ឌទាហាន នៃកងរាជអាវុធហត្ថលើផ្ទៃប្រទេស បានយ៉ាងងាយ ត្រឹមរយៈពេល៣ទៅ៤ខែប៉ុណ្ណោះ ជាថ្នូរនឹងលុយចំនួន១០.៥០០ដុល្លារក្នុងម្នាក់..!!។
*ដោយការជឿទុកចិត្ត និងចង់ឱ្យកូនប្រុសរបស់ខ្លួន បានបម្រើការងារជាមន្ត្រីកងរាជអាវុធហត្ថផងនោះ..!។
លោក សុក សុផល ក៏បានប្រគល់ប្រាក់ចំនួន១០.៥០០ដុល្លារ ឱ្យលោក គង់ វីរៈ តាមការព្រមព្រៀង ដែលបាននិយាយគ្នា ដើម្បីឱ្យកូនប្រុសរបស់ខ្លួនឈ្មោះ សុក សុផា អាយុ២៩ឆ្នាំ បានចូលក្របខ័ណ្ឌទាហាន នៃកងរាជអាវុធហត្ថលើផ្ទៃប្រទេស!! ក្នុងនោះ ក៏បានធ្វើកិច្ចសន្យា និងថតជា”វីដេអូ”ទុកជាភស្តុតាងទៀតផង.!។
ប៉ុន្តែ ក្រោយទទួលប្រាក់រយៈពេល៧ខែ.និងផុតកំណត់នៃការសន្យា បែរជាឈ្មោះ សុក សុផា មិនបានចូលក្របខ័ណ្ឌតាមសន្យា.!។
ជនរងគ្រោះ ក៏តាមទារលុយពីលោក គង់ វីរៈ ខណៈលោក គង់ វីរៈ ធ្លាប់បានអះអាងថា បើខ្លួនរត់ការមិនបានសម្រេច នឹងប្រគល់លុយឱ្យវិញគ្រប់ចំនួន.!។
លោក សុក សុផល បន្តទៀតថា នៅពេលដែលខ្លួន តាមទារលុយនិងស្កាត់ជួបជាបន្តបន្ទាប់…!។
លោកវរសេនីយ៍ត្រី គង់ វីរៈ ក៏បានសងប្រាក់ខ្លះដែរ ប៉ុន្តែមិនច្បាស់លាស់តាមកាលបរិច្ឆេទ គឺរដិបរដុបម្ដងបន្តិចៗពុំមានអ្វីជាដុំកំភួន.!។
ពោលគឺរយៈពេលជាង២ឆ្នាំ សងបានសរុបចំនួន៧.០០០ដុល្លារ នៅខ្វះចំនួន៣.៥០០ដុល្លារទៀត លោក គង់ វីរៈ បានគេចវេះ ខលមិនលើកទាក់ទងលែងបានតែម្ដង.ធ្វើឱ្យខ្លួនជាម្ចាស់ប្រាក់ រងការខាតបង់ កើតទុក្ខរីងរៃ ដោយសារជំពាក់បំណុលគេ.!!។
*ដើម្បីឱ្យមានចម្លើយទាំងសងខាង នៅថ្ងៃទី២២.០៤.២០២៦”ដើមរាំង”បានព្យាយាមសុំការបំភ្លឺ ពីលោកវរសេនីយ៍ត្រី គង់ វីរៈ ប៉ុន្តែទូរស័ព្ទចូលហើយលោកមិនទទួល លុះខលទៀតលោកចុចបិទរហូត.!!។
*ទោះជាយ៉ាងណាក៏ដោយ ពលរដ្ឋរងគ្រោះ សុំស្នើយ៉ាងទទូចដល់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាចាត់វិធានការវះកាត់លើលោកវរសេនីយ៍ត្រី គង់ វីរៈ កុំឱ្យមានការយោគយល់ឱ្យសោះ! ដើម្បីបង្ខំឱ្យបុគ្គលមន្ត្រីរូបនេះ ប្រគល់ប្រាក់មកឱ្យខ្លួនវិញ ដោយក្ដីអនុគ្រោះ៕
