ភ្លើងបានឆាបឆេះលើសាឡាងដឹកអ្នកដំណើរMV June Aster នៅឯសមុទ្រភាគខាងលិចប្រទេសហ្វីលីពីន កាលពីល្ងាចថ្ងៃពុធ បណ្តាលឱ្យមនុស្សយ៉ាងហោចណាស់៥នាក់ស្លាប់ និងរាប់សិបនាក់ទៀតបាត់ខ្លួន។
ប្រភពពីសារព័ត៌មានAp នៅថ្ងៃទី១០ខែកញ្ញា។
អាជ្ញាធរបានឱ្យដឹងថា មនុស្ស៤៣នាក់ត្រូវបានជួយសង្គ្រោះ ខណៈប្រតិបត្តិការស្វែងរក និងជួយសង្គ្រោះនៅតែបន្ត។ សាឡាងនៅតែអណ្តែត ប៉ុន្តែបានទ្រេតខ្លាំង បន្ទាប់ពីភ្លើងត្រូវបានពន្លត់។
សាឡាងបានចេញដំណើរពីរដ្ឋធានី ម៉ានីល ឆ្ពោះទៅកាន់ទីក្រុង Coron ក្នុងខេត្ត Palawan ហើយភ្លើងបានចាប់ផ្តើមប្រហែលម៉ោង ៦:៤៥នាទីល្ងាច ខណៈសាឡាងកំពុងខិតជិតដល់គោលដៅ។
ក្រុមឆ្មាំសមុទ្រ កងទ័ព និងទូករដ្ឋាភិបាល រួមទាំងអ្នកស្ម័គ្រចិត្ត និងអ្នកនេសាទ បានចូលរួមក្នុងការស្វែងរកអ្នកបាត់ខ្លួន។ អាជ្ញាធរក៏បានជូនដំណឹងដល់នាវានៅក្បែរនោះ និងភូមិឆ្នេរសមុទ្រ ឱ្យជួយស្វែងរកអ្នកដំណើរដែលអាចត្រូវបានចរន្តទឹកនាំទៅ៕
