ទីភ្នាក់ងារព័ត៌មានBloomberg បានរាយការណ៍កាលពីថ្ងៃចន្ទទី០៥.១០.២០២៦ថា បំពង់បង្ហូរប្រេងពីខាងកើតទៅខាងលិចរបស់អារ៉ាប៊ីសាអូឌីត កំពុងដំណើរការជាធម្មតា។ បន្ទាប់ពីមានរបាយការណ៍មុននេះថា ការវាយប្រហារថ្មីមួយបានធ្វើឱ្យការដឹកជញ្ជូនប្រេងតាមផ្លូវនាំចេញដ៏សំខាន់នេះត្រូវផ្អាក។
Bloomberg បានដកស្រង់សម្តីអ្នកដែលដឹងពីបញ្ហានេះមកបញ្ជាក់ថា ប្រេងនៅតែបន្តហូរតាមបំពង់បង្ហូរនេះ។
មុននេះបណ្តាញព័ត៌មានផ្សេងទៀតបានរាយការណ៍ថា ការវាយប្រហារថ្មីមួយទៅលើស្ថានីយបូមប្រេងនៅតំបន់ Khurais ភាគខាងកើតនៃទីក្រុង Riyadh បានបង្កឱ្យមានការខូចខាតយ៉ាងធ្ងន់ធ្ងរ និងធ្វើឱ្យប្រតិបត្តិការត្រូវផ្អាក ដោយយោងតាមប្រភពព័ត៌មានមិនបញ្ចេញឈ្មោះដែលធ្វើការក្នុងវិស័យថាមពលរបស់អារ៉ាប៊ីសាអូឌីត។
យោងតាមរបាយការណ៍នេះ ក្រុមហ៊ុន Saudi Aramco និងក្រសួងថាមពលអារ៉ាប៊ីសាអូឌីតមិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់ Bloomberg នោះទេ។
តម្លៃប្រេងបានថយចុះពីកម្រិតដែលបានកើនឡើង បន្ទាប់ពីមានរបាយការណ៍របស់ Bloomberg។ តម្លៃប្រេងធ្លាប់បានកើនឡើងរហូតដល់ ១,២% បន្ទាប់ពីមានរបាយការណ៍មុននេះ។
យោងតាម Bloomberg ក្រុមហ៊ុន Aramco បានបង្កើនការដឹកជញ្ជូនប្រេងតាមបំពង់បង្ហូរនេះដល់ជាង ៨០% នៃសមត្ថភាពដឹកជញ្ជូនសរុប ៧ លានបារ៉ែលក្នុងមួយថ្ងៃ នៅត្រឹមចុងសប្តាហ៍មុន។ ក្រុមហ៊ុនបានបន្ថែមថា បន្ទាប់ពីផ្គត់ផ្គង់ដល់រោងចក្រចម្រាញ់ប្រេងនៅឆ្នេរសមុទ្រភាគខាងលិចរបស់អារ៉ាប៊ីសាអូឌីតរួចមក នៅសល់ប្រេងប្រហែល ៤,៥ លានបារ៉ែលក្នុងមួយថ្ងៃសម្រាប់ការនាំចេញ។
បំពង់បង្ហូរប្រេងនេះ តភ្ជាប់កន្លែងផលិតប្រេងនៅភាគខាងកើតរបស់អារ៉ាប៊ីសាអូឌីត ទៅកាន់ឆ្នេរសមុទ្រក្រហម (Red Sea) ដែលអនុញ្ញាតឱ្យមានការនាំចេញប្រេងឆៅដោយមិនចាំបាច់ឆ្លងកាត់ច្រកសមុទ្រ Hormuz។
ក្រសួងថាមពលអារ៉ាប៊ីសាអូឌីត ធ្លាប់បានបញ្ជាក់ពីមុនថា ការវាយប្រហារកាលពីថ្ងៃទី ១០ ខែកញ្ញា បានកំណត់គោលដៅលើបំពង់បង្ហូរប្រេងនៅក្នុងតំបន់ Riyadh និង Medina ដែលនាំឱ្យមានការផ្អាកប្រតិបត្តិការជាវិធានការបង្ការ៕
