យោងតាមប្រព័ន្ធផ្សព្វផ្សាយអ៊ីស្រាអែល ព្រះរាជអាជ្ញាអ៊ីស្រាអែល បានចោទប្រកាន់សាស្រ្តាចារ្យគណិតវិទ្យាម្នាក់មកពីសាកលវិទ្យាល័យ Bar-Ilan កាលពីថ្ងៃចន្ទទី០៥.១០.២០២៦ ពីបទរៀបចំការវាយប្រហារភេរវកម្ម ការគំរាមកំហែង និងការរារាំងដល់ដំណើរការយុត្តិធម៌។
ដោយសារតែគាត់បានរៀបចំផែនការសម្លាប់ពលរដ្ឋអារ៉ាប់រាប់រយនាក់ និងបង្ខំឱ្យពលរដ្ឋរាប់ពាន់នាក់ផ្សេងទៀតភៀសខ្លួនទៅកាន់ប្រទេសហ្ស៊កដានី លីបង់ និងតំបន់ហ្គាហ្សា (Gaza Strip)។
សារព័ត៌មានAnadolu។
កាសែត The Times of Israel បានរាយការណ៍ថា ការិយាល័យព្រះរាជអាជ្ញារដ្ឋបានបញ្ជាក់ថា ជនសង្ស័យរូបនេះ (ដែលអត្តសញ្ញាណរបស់គាត់ត្រូវបានរក្សាជាការសម្ងាត់តាមបញ្ជាតុលាការ) បានរៀបចំផែនការដ៏ល្អិតល្អន់មួយក្នុងរយៈពេលជិត ៣ ឆ្នាំ ហើយបានស្វែងរកជំនួយពី “ក្រុមដែលមាននិន្នាការបង្កអស្ថិរភាព” នៅក្នុងកងទ័ពអាកាស កងកាំភ្លើងធំ និងកងរថក្រោះរបស់អ៊ីស្រាអែល។
យោងតាមព្រះរាជអាជ្ញា ជនសង្ស័យដែលមានអាយុប្រហែល៦០ ឆ្នាំរូបនេះ ត្រូវបានចាប់ខ្លួនកាលពីថ្ងៃទី ១៧ ខែកញ្ញា ហើយបានទទួលស្គាល់ការចោទប្រកាន់ប្រឆាំងនឹងរូបគាត់។
ឯកសារចោទប្រកាន់បានឱ្យដឹងថា គាត់បានចំណាយពេល ១៨ខែចុងក្រោយនេះក្នុងការស្វែងរកមនុស្សចូលរួមក្នុងផែនការនេះ និងបានស្វែងរក “ឥស្សរជននយោបាយដ៏សំខាន់ម្នាក់” ដែលអាចជួយជ្រើសរើសអ្នកចូលរួមដែលមានអាវុធ។
កាសែតនេះបានរាយការណ៍ថា នៅទីបំផុត គាត់បានទាក់ទងទៅលោក Moshe Feiglin អតីតសមាជិកសភាមកពីគណបក្ស Likud ដែលក្រុម Zehut របស់គាត់បានចាប់ដៃគូជាមួយគណបក្ស Religious Zionism របស់រដ្ឋមន្ត្រីហិរញ្ញវត្ថុដែលមាននិន្នាការជ្រុលនិយម គឺលោក Bezalel Smotrich មុនការបោះឆ្នោតនៅថ្ងៃទី ២៧ ខែតុលា។
ព្រះរាជអាជ្ញាបានឱ្យដឹងថា បន្ទាប់ពីលោក Feiglin មិនបានឆ្លើយតប សាស្រ្តាចារ្យរូបនេះបានព្យាយាមគំរាមកំហែងលោក Feiglin ឱ្យចូលរួមជាមួយផែនការនេះ កាលពីប្រហែលមួយខែមុន ដោយប្រើប្រាស់វិធីសាស្ត្រផ្សេងៗដើម្បីលាក់បាំងផែនការ និងរារាំងមិនឱ្យគេរកឃើញផែនការនោះ។
យោងតាមឯកសារតុលាការ លោក Feiglin ជំនួយការរបស់គាត់គឺលោក Yitzhak Hai Zaga និងនាយកប្រតិបត្តិក្រុម Zehut គឺលោក Shai Malka បានប្រគល់លិខិតគំរាមកំហែងដែលពួកគេទទួលបានពីជនសង្ស័យទៅឱ្យប៉ូលិស។
សាស្រ្តាចារ្យរូបនេះបានដាក់ឈ្មោះផែនការនោះថា “Ayit” ដែលជាពាក្យភាសាហេប្រ៊ូមានន័យថា “ឥន្ទ្រី” (eagle) ហើយក៏ជាអក្សរកាត់សម្រាប់ឃ្លាមួយដែលមានន័យថា “ប្រជាជាតិនឹងអនុវត្តការផ្លាស់ទីលំនៅ” (the nation will carry out transfer) ដែលសំដៅទៅលើការបណ្តេញជនជាតិប៉ាឡេស្ទីនចេញ។
កាសែតនេះបានរាយការណ៍ថា គាត់បានចាប់ផ្តើមរៀបចំផែនការនេះ នៅខែកុម្ភៈ ឆ្នាំ២០២៣ បន្ទាប់ពីមានការតវ៉ាកាលពីឆ្នាំ២០២១ នៅក្នុងទីក្រុងដែលមានប្រជាជនចម្រុះ៕
