កងទ័ពចម្រុះដឹកនាំដោយអារ៉ាប៊ីសាអូឌីត បានបើកប្រតិបត្តិការយោធាធំមួយប្រឆាំងក្រុមហ៊ូធី នៅខេត្តហូដៃដា ប្រទេសយេម៉ែន ដោយផ្តោតលើទីតាំងអាវុធ និងសម្ភារៈយោធាតាមតំបន់ឆ្នេរសមុទ្រក្រហម។
ប្រភពពីសារព័ត៌មានTRT World នៅថ្ងៃទី៦ខែតុលា។
អ្នកនាំពាក្យកងទ័ពចម្រុះ លោក Turki al-Maliki បាននិយាយថា កងកម្លាំងបានបំផ្លាញឃ្លាំងអាវុធ កន្លែងរក្សាទុកទូកផ្ទុកគ្រឿងផ្ទុះ និងមីនក្នុងសមុទ្រ។ លោកថា ប្រតិបត្តិការនេះមានគោលបំណងទប់ស្កាត់ផែនការវាយប្រហារដែលជិតនឹងកើតឡើងលើផ្លូវនាវាចរណ៍អន្តរជាតិនៅភាគខាងត្បូងសមុទ្រក្រហម។
ការវាយប្រហារនេះកើតឡើង ខណៈសង្គ្រាមនៅយេម៉ែនកំពុងកាន់តែខ្លាំង។ យោធាយេម៉ែនបានប្រកាសថា ខ្លួនបានបើកការវាយលុកដើម្បីដណ្តើមទីក្រុងសាណាដែលស្ថិតក្រោមការគ្រប់គ្រងរបស់ហ៊ូធី ដោយបានធ្វើការវាយប្រហារជាង ១,០០០ លើក។
ជាមួយគ្នានេះ កងទ័ពចម្រុះបានបញ្ជូនយន្តហោះចម្បាំងប្រហែល ១០០ គ្រឿងធ្វើប្រតិបត្តិការតាមតំបន់ផ្សេងៗរបស់យេម៉ែន។ រដ្ឋាភិបាលយេម៉ែនដែលទទួលស្គាល់ជាអន្តរជាតិ បានប្រកាសថា គោលដៅរបស់ខ្លួនគឺដណ្តើមយកតំបន់ទាំងអស់ដែលហ៊ូធីកំពុងគ្រប់គ្រងមកវិញ៕
