(ភ្នំពេញ)៖ សមត្ថកិច្ចគយ សហការជាមួយមន្ត្រីនគរបាលអន្តោប្រវេសន៍ កាលពីថ្ងៃទី២៩ ខែកញ្ញា ឆ្នាំ២០២៦ បានត្រួតពិនិត្យអ្នកដំណើរបរទេសចំនួន ៣នាក់ ក្នុងករណីផ្សេងគ្នានៅអាកាសយានដ្ឋានអន្តរជាតិសៀមរាបអង្គរ និងអាកាសយានដ្ឋានអន្តរជាតិតេជោ ដោយរកឃើញសារធាតុសង្ស័យជាគ្រឿងញៀន ប្រភេទកូកាអ៊ីន និងកញ្ឆាក្រៀម។
ករណីទី១ នៅអាកាសយានដ្ឋានអន្តរជាតិសៀមរាបអង្គរ មន្ត្រីត្រួតពិនិត្យអ្នកដំណើរបរទេសចំនួន១នាក់ នៅស្ថានីយអ្នកដំណើរចេញ ហើយបានរកឃើញម្សៅម៉ត់ពណ៌សសង្ស័យជាសារធាតុញៀនប្រភេទកូកាអ៊ីន មានទម្ងន់សុទ្ធសរុប ១៩៨៤,៨០ក្រាម។
ករណីទី២ នៅអាកាសយានដ្ឋានអន្តរជាតិតេជោ ក្រុមការងារបានត្រួតពិនិត្យអ្នកដំណើរបរទេសចំនួន ២នាក់ នៅស្ថានីយអ្នកដំណើរចេញ ដោយបានរកឃើញរុក្ខជាតិក្រៀមសង្ស័យជាសារធាតុញៀនប្រភេទកញ្ឆា ចំនួន ៩៧ដុំ ដែលមានទម្ងន់សុទ្ធសរុប ៤៨ ២៥៧,៥ក្រាម។
បន្ទាប់ពីបានបំពេញនីតិវិធីបឋម និងរៀបចំកំណត់ហេតុល្មើសច្បាប់គយរួចរាល់ ក្រុមការងារបានប្រគល់ជនសង្ស័យ វត្ថុតាង និងសម្ភារៈពាក់ព័ន្ធទាំងអស់ ជូនអង្គភាពនគរបាលប្រឆាំងគ្រឿងញៀន ដើម្បីគ្រប់គ្រង ថែរក្សា និងចាត់ការបន្តតាមនីតិវិធីច្បាប់ជាធរមាន៕
