តុលាការជាន់ខ្ពស់អូស្ត្រាលីបានសម្រេចឲ្យរដ្ឋាភិបាលអូស្ត្រាលីឈ្នះក្នុងសំណុំរឿងជម្លោះផ្លូវច្បាប់ជាមួយប្រទេសរុស្ស៊ី អំពីការសាងសង់ស្ថានទូតថ្មីមួយនៅជិតសភា។ សាលាដំបូងបង្ហាញថា ការលុបចោលកិច្ចសន្យាជួលរយៈពេល ៩៩ ឆ្នាំរបស់រុស្ស៊ី គឺជាសកម្មភាពស្របច្បាប់ និងស្របតាមសិទ្ធិនីតិបញ្ញត្តិ របស់រដ្ឋាភិបាលអូស្ត្រាលី។
ប្រភពពីសារព័ត៌មានAl Jazeera កាលពីថ្ងៃទី ១២ ខែវិច្ឆិកា ឆ្នាំ ២០២៥។
ករណីនេះកើតឡើងបន្ទាប់ពីរដ្ឋាភិបាលអូស្ត្រាលីបានអនុម័តច្បាប់មួយក្នុងឆ្នាំ ២០២៣ ដើម្បីលុបចោលកិច្ចសន្យាជួលដីសម្រាប់ស្ថានទូតរុស្ស៊ី ដែលមានទីតាំងប្រហែល ៣០០ ម៉ែត្រពីវិមានសភា។ មន្ត្រីសន្តិសុខបានព្រមានថា ទីតាំងនេះអាចបង្កការគំរាមកំហែងដល់សន្តិសុខជាតិ។
នាយករដ្ឋមន្ត្រី Anthony Albanese បាននិយាយថា ការសម្រេចចិត្តលុបចោលកិច្ចសន្យាជួលនេះ មិនមែនជាការសម្រេចចិត្តងាយទេ ប៉ុន្តែជាចាំបាច់ ដោយសារតែ ហានិភ័យជាក់លាក់ដែលបណ្តាលមកពីទីតាំងនោះ។
រដ្ឋាភិបាលមូស្គូបានប្តឹងតវ៉ាច្បាប់នេះ ដោយអះអាងថា វាខុសនឹងរដ្ឋធម្មនុញ្ញអូស្ត្រាលី។ ទោះជាយ៉ាងណា តុលាការជាន់ខ្ពស់បានសម្រេចជាឯកច្ឆន្ទថា រដ្ឋាភិបាលអូស្ត្រាលីមានសិទ្ធិស្របច្បាប់ក្នុងការលុបចោលកិច្ចសន្យាជួលនោះ ព្រោះវាជាការប្រើប្រាស់អំណាចច្បាប់សម្រាប់ការគ្រប់គ្រងអចលនទ្រព្យសាធារណៈ។
យ៉ាងណាមិញ តុលាការបានសម្រេចថា រុស្ស៊ីមានសិទ្ធិទទួលបានសំណង បន្ទាប់ពីបានបង់ប្រាក់ប្រហែល ២ លានដុល្លារ អាមេរិក សម្រាប់កិច្ចសន្យាជួលដីរយៈពេល ៩៩ ឆ្នាំ តាំងពីឆ្នាំ ២០០៨៕