(កំពង់ធំ)៖ ថ្លែងប្រាប់”ដើមរាំង”នៅរសៀលថ្ងៃទី២០.១១.២០២៥ លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានលើកឡើងថា សរុបហេតុការណ៍ រថយន្ដក្រុងបើកបុកក្បាលស្ពាន”អូរប្រាសាទ”ក្រឡាប់ចូលទឹកជម្រៅ៧ម៉ែត្រ ស្លាប់មនុស្សប្រុសស្រីចំនួន១៣នាក់ និងរបួស២៤នាក់។
បើតាមលោកឧត្តមសេនីយ៍ទោ ហេង សុផល រថយន្ដក្រុងមួយនេះ បានបុកក្បាលស្ពានពេញទំហឹង បណ្ដាលឱ្យតួនៃរថយន្តជាប់គាំងលើស្ពាន។
រីឯទ្រុងរថយន្ត បានផ្លោងទៅជាមួយមនុស្ស ហោះចូលក្នុងទឹកជម្រៅ៧ម៉ែត្រ បង្កជាការស្លាប់ និងរបួសតែម្ដង។
បច្ចុប្បន្ន៖ អ្នករបួសត្រូវបានបញ្ជូន ទៅសំរាកនៅមន្ទីរពេទ្យបង្អែក ខេត្តកំពង់ធំ។
សូមជម្រាបថា ករណីគ្រោះថ្នាក់ចរាចរណ៍ដ៏រន្ធត់មួយនេះ បានកើតឡើងត្រង់ចំណុច”អូរប្រាសាទ”ស្ថិតនៅភូមិជ័យជំនះ ឃុំកកោះ ស្រុកសន្ទុក ខេត្តកំពង់ធំ កាលពីវេលាម៉ោង ២ទៀបភ្លឺ ឈានចូលថ្ងៃទី ២០ ខែវិច្ឆិកា ឆ្នាំ២០២៥។
*សេចក្តីរាយការណ៍បានឱ្យដឹងថា រថយន្តបង្កជាប្រភេទ រថយន្តក្រុង២ជាន់ និងបានដឹកអ្នកដំណើរសរុបទាំងតៃកុងចំនួន៣៧នាក់ ធ្វើដំណើរទិសដៅ ពីសៀមរាប ឆ្ពោះមកកាន់ភ្នំពេញ ក្នុងល្បឿនលឿន ។
លុះមកដល់កន្លែងកើតហេតុ ទំនងតៃកុងងងុយដេក និងងោកមួយភាំង ស្រាប់តែបួងចង្រូត ជ្រុលបុកក្បាលស្ពាន អូរប្រាសាទទាំងកម្រោល ផ្លោងតួរថយន្ត ហោះចូលក្នុងទឹកតែម្ដង។
ក្រោយកើតហេតុភ្លាមៗ សមត្ថកិច្ចបានចុះជួយអន្តរាគមន៍ ស្រង់សាកសពចេញពីក្នុងទឹក និងបញ្ជូនអ្នករបួសទៅកាន់មន្ទីរពេទ្យ៕
