កាលពីថ្ងៃអាទិត្យទី២៣ខែវិច្ឆិកា កងទ័ពអ៊ីស្រាអែល បានឃុំខ្លួនជនជាតិប៉ាឡេស្ទីនចំនួន១១នាក់ នៅក្នុងការវាយឆ្មក់យោធានៅទូទាំងតំបន់West Bank ដែលខ្លួនកាន់កាប់ នេះបើយោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក។
ប្រភពពីសារព័ត៌មានAANews។
ទីភ្នាក់ងារសារព័ត៌មានផ្លូវការ Wafa បាននិយាយថា មនុស្ស៩នាក់ ក្នុងនោះមានកុមារម្នាក់ ត្រូវបានចាប់ខ្លួនដោយអ៊ីស្រាអែល នៅពេលដែលកងកម្លាំងយោធាបានវាយឆ្មក់ទីក្រុង Bethlehem ភាគខាងត្បូង និងទីក្រុង Dura, Al-Karmel ភាគខាងត្បូងនៃ Hebron និង Beit Ummar ភាគខាងជើងនៃទីក្រុង។
ទីភ្នាក់ងារសារព័ត៌មាននេះបាននិយាយថា ផ្ទះជាច្រើនត្រូវបានឆែកឆេរក្នុងអំឡុងពេលវាយឆ្មក់។
កងកម្លាំងអ៊ីស្រាអែលក៏បានចាប់ខ្លួនបងប្អូនប៉ាឡេស្ទីន២នាក់ក្នុងអំឡុងពេលវាយឆ្មក់នៅក្នុងទីក្រុង Burin ភាគខាងត្បូងនៃ Nablus នៅភាគខាងជើងនៃតំបន់ West Bankផងដែរ។
កងទ័ពអ៊ីស្រាអែលបានបង្កើនការវាយប្រហាររបស់ខ្លួននៅក្នុងតំបន់ West Bank ចាប់តាំងពីការចាប់ផ្តើមនៃសង្គ្រាម Gaza ក្នុងខែតុលា ឆ្នាំ ២០២៣។
ចាប់តាំងពីពេលនោះមក ជនជាតិប៉ាឡេស្ទីនជាង ១.០០០ នាក់ត្រូវបានសម្លាប់ និងជិត ១១.០០០ នាក់ផ្សេងទៀតបានរងរបួសនៅក្នុងការវាយប្រហារដោយកងទ័ព និងអ្នកតាំងលំនៅខុសច្បាប់នៅក្នុងទឹកដីដែលកាន់កាប់។ មនុស្សជាង ២០.០០០ នាក់ក៏ត្រូវបានចាប់ខ្លួនផងដែរ៕