ប្រទេសជាច្រើន រួមទាំងប្រទេសចិន និងអូស្ត្រាលី បានប្រកាសផ្តល់ជំនួយដល់ប្រទេសស្រីលង្កា បន្ទាប់ពីទឹកជំនន់ដ៏សាហាវ ដែលបានសម្លាប់មនុស្សជាង៣៣០នាក់ និងបានធ្វើឱ្យមនុស្ស៣៧០នាក់ផ្សេងទៀតបាត់ខ្លួន នេះបើយោងតាមរបាយការណ៍ប្រព័ន្ធផ្សព្វផ្សាយនៅថ្ងៃចន្ទទី១ខែធ្នូឆ្នាំ២០២៥។
ប្រភពពីសារព័ត៌មានReuters។
យោងតាមរបាយការណ៍ប្រព័ន្ធផ្សព្វផ្សាយក្នុងស្រុក News 1st បានរាយការណ៍ថា ស្ថានទូតចិនប្រចាំប្រទេសស្រីលង្កាបានប្រកាសផ្តល់ជំនួយសង្គ្រោះបន្ទាន់ចំនួន ១០០,០០០ ដុល្លារ ខណៈដែលប្រទេសនេប៉ាល់ក៏បានសន្យាផ្តល់ជំនួយចំនួន ២០០,០០០ ដុល្លារ ដើម្បីគាំទ្រដល់ប្រតិបត្តិការសង្គ្រោះ និងស្តារឡើងវិញនៅក្នុងតំបន់ដែលរងផលប៉ះពាល់ដោយទឹកជំនន់។
ប្រទេសអូស្ត្រាលីបានប្រកាសរួចហើយថា នឹងផ្តល់ជំនួយចំនួន ១ លានដុល្លារអូស្ត្រាលី (៦៥០,០០០ ដុល្លារ) ដើម្បីគាំទ្រដល់កិច្ចខិតខំប្រឹងប្រែងឆ្លើយតប និងស្តារឡើងវិញជាបន្ទាន់ ខណៈដែលប្រទេសឥណ្ឌាបានបញ្ជូនក្រុមដែលមានសមាជិក ៨០ នាក់ ដើម្បីជួយដល់ប្រជាជនដែលរងផលប៉ះពាល់។
រហូតមកដល់ពេលនេះ មនុស្ស ៣៣៤ នាក់បានស្លាប់ និង ៣៧០ នាក់ផ្សេងទៀតកំពុងបាត់ខ្លួន បន្ទាប់ពីមានទឹកជំនន់ដ៏សាហាវនៅក្នុងប្រទេសកោះអាស៊ីខាងត្បូងនេះ។
ប្រតិបត្តិការស្វែងរក និងជួយសង្គ្រោះនៅតែបន្តនៅក្នុងតំបន់ជាច្រើនដែលរងផលប៉ះពាល់ដោយទឹកជំនន់ ការរអិលបាក់ដី និងការបំផ្លិចបំផ្លាញយ៉ាងទូលំទូលាយ ចាប់តាំងពីកោះនេះរងផលប៉ះពាល់ដោយអាកាសធាតុធ្ងន់ធ្ងរនៅថ្ងៃទី ១៧ ខែវិច្ឆិកា៕