កាលពីថ្ងៃចន្ទទី១ខែធ្នូ អង្គការសហប្រជាជាតិបានអំពាវនាវឱ្យមានការប្រកាន់យ៉ាងខ្ជាប់ខ្ជួនចំពោះច្បាប់អន្តរជាតិ ដើម្បីធានាសុវត្ថិភាពនៃអាកាសចរណ៍ស៊ីវិលអន្តរជាតិ បន្ទាប់ពីការប្រកាសរបស់សហរដ្ឋអាមេរិកថា ដែនអាកាសវេណេស៊ុយអេឡានឹងត្រូវបិទទាំងស្រុង។
ប្រភពពីសារព័ត៌មានReuters។
លោក Stephane Dujarric អ្នកនាំពាក្យរបស់អគ្គលេខាធិការ បានជំរុញឱ្យប្រទេសនានាបង្ហាញការគោរពចំពោះកាតព្វកិច្ចរបស់ពួកគេក្រោមច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិ និងក្របខ័ណ្ឌច្បាប់ដែលអាចអនុវត្តបានទាំងអស់។
លោក Dujarric បានសង្កត់ធ្ងន់លើតម្រូវការក្នុងការប្រើប្រាស់យន្តការដែលមានស្រាប់ ដើម្បីដោះស្រាយបញ្ហា ដោយសន្តិវិធី ដើម្បីធានាសុវត្ថិភាព សន្តិសុខ និងការតភ្ជាប់នៃអាកាសចរណ៍ស៊ីវិលអន្តរជាតិ។
ការអំពាវនាវនេះកើតឡើងបន្ទាប់ពីប្រធានាធិបតីអាមេរិក លោក Donald Trump ថ្មីៗនេះបានគំរាមកំហែងនៅលើប្រព័ន្ធផ្សព្វផ្សាយសង្គមថាបិទទាំងស្រុងដែនអាកាសវេណេស៊ុយអេឡា។
គួរជម្រាបថា ចាប់តាំងពីខែកញ្ញាមក យោធាអាមេរិកបានធ្វើការវាយប្រហារចំនួន 21 លើកលើនាវាដែលខ្លួនអះអាងថាផ្ទុកគ្រឿងញៀន ដោយបានសម្លាប់មនុស្ស 83 នាក់៕